చతుర్దశ అధ్యాయం (చతుష్షష్టి యోగినీ వివరములు)
శ్లోకాలు: 110/2-120, సహస్రనామాలు: 535-600
‘స్వాహా’ రూపిణికి నమస్కారాలు.
‘స్వధా’ స్వరూపిణికి ప్రణామాలు.
‘అవిద్యా’ స్వరూపిణికి ప్రణామాలు.
మేధా స్వరూపిణికి నమస్కారాలు.
శ్రుతి-- అంటే వేదం స్వరూపిణికి నమోవాకాలు.
స్మృతులనగా--స్మరించి అనుసరించి ఆచరించిన ధర్మశాస్త్రము. అట్టి స్మృతి స్వరూపిణికి ప్రణామాలు.
అనుత్తమమూర్తికి వందనాలు.
పుణ్యకీర్తిగల మాతకు వందనాలు.
పుణ్యకార్యాల వలన మాత్రమే లభించునట్టి మాతకు వందనాలు.
శ్రీలలితానామ, గుణ, లీలాదుల శ్రవణకీర్తనాదుల మాత్రాన పుణ్యం లభిస్తుంది.
పులోమమహర్షినందన అయిన శచీదేవిచే అర్చించబడిన తల్లికి ప్రణామాలు.
ప్రకృతి బంధనాల నుండి, సంసార బంధనాల నుండి కూడ ముక్తిని ప్రసాదించగల మహేశ్వరికి ప్రణామాలు.
దట్టమైన కేశపాశం కల తల్లికి ప్రణామాలు.
విమర్శించ గల మహత్తర శక్తి స్వరూపిణికి ప్రణామాలు.
మోక్షదాయకమగు విద్యా స్వరూపిణికి వందనాలు.
ఆకాశాది పాంచభౌతిక జగత్తును సృష్టించు మాతకు వందనాలు.
శారీరక బాధలైన వ్యాధులను, మానసిక బాధలైన వ్యాధులనూ- సర్వవ్యాధులనూ రూపుమాపునట్టి మాతకు వందనాలు.
అపమృత్యు, అకాలమృత్యువాదిగాగల సర్వమృత్యువులనూ నివారించునట్టి మాతకు వందనాలు.
జగదాది కూడా ఆదిమూర్తి అయిన ప్రప్రథమంగా గణించదగిన మాతకు వందనాలు.
చింతించుటకు వీలుకాని మహత్తర స్వరూపిణికి ప్రణామాలు.
కలికాల సంబంధమైన సమస్త కల్మషాలనూ నాశనం చేయునట్టి మాతకు ప్రణామాలు.
దేవతలందరి తేజస్సుతో కత్యుడనేమహర్షి పుత్రిక అవతరించిన కాత్యాయనీ దేవికి ప్రణామాలు.
కాలాన్ని సైతం హరించునట్టి దేవికి వందనాలు.
కమలాక్షుడంటే శ్రీహరి. అట్టి శ్రీహరిచేత కూడా సేవింపబడిన తల్లికి వందనాలు.