తెలుగు భాష ఆదికవి నన్నయ కంటే ముందుగానే ప్రాచుర్యంలో ఉందని ఆరుద్ర వంటి మహావిశ్లేషకుడు, కవి ఋజువులతో సహా వివరించారు.

అంతటి ప్రాచీనమైన సాహిత్య విలువలతో నిండిన మన మాతృభాష, తెలుగు ప్రాశస్త్యము వర్ణించనలవి కానిది. జంటపదాల జలతారు, హ్రస్వదీర్ఘాల హంగామా, ద్విపద అక్షరాల పదధార, ఐదు వేల పైచిలుకు సామెతలు, పొడుపు కథలు, జనపదాల నుండి జాలువారిన జానపద జావళి, ఎన్నో రకాల ప్రాసలు, వ్యాకరణ అలంకరణలు, నీతికథలు, జీవనసూక్తులు.. ఇలా ఒకటేమిటి ఎన్నో విభిన్నమైన ప్రక్రియలు మన తెలుగు భాషకు మాత్రమే పరిమితం.

మరి, అంతటి ప్రాభవాన్ని కలిగి నేటికీ మన సంస్కృతీ సంప్రదాయాలను ప్రతిబింబిస్తూ పరిమళిస్తున్న మన తెలుగు భాషను పరిరక్షించి భావితరాలకు అందజేయవలసిన బాధ్యత మనపై తప్పక ఉంటుంది. ఆ భావనతోనే ఒక భాషాప్రేమికుడిగా, విలువైన తెలుగు సాహిత్యరచనలకు ఒక వేదిక ఉండాలనే తపనతో నా శ్రీమతి ఉమాప్రియ మనఃపూర్వకమైన సహకారంతో, మా ఈ “సిరిమల్లె” అంతర్జాలమాసపత్రిక (మా మానస పుత్రిక) ఆగష్టు 2015 లో ఆవిర్భవించింది. నాటినుండి, 133 సంచికలతో నేటికీ అప్రతిహతంగా కొనసాగుతున్నది.

ఈ సాహితీపరమైన పూదోటలో విరులను సేకరించి మార్పులు, చేర్పులు, కూర్పులు చేయడం నా వంతు అయితే, వాటిని తన కార్యదీక్షతో కర్తవ్యనిబద్ధతతో విభిన్నమైన ఆకృతులతో ఎంతో హృద్యంగా అమర్చి పాఠకులకు అంతర్జాలంలో అందించడం ఉమాప్రియ చేస్తున్న మహత్తరమైన నిరంతరకృషి.

ఎటువంటి స్వలాభాపేక్ష లేకుండా మేము చేస్తున్న ఈ సాహిత్యసేవకు సంతృప్తులై, మా ఈ భాషాయజ్ఞానికి ఎంతోమంది రచనల ద్వారా తమ సహాయ సహకారాలు అందిస్తున్నారు. కనుకనే సిరిమల్లె అందరిదీ. సాహిత్యాభిమాను లందరూ ఇందులో కుటుంబసభ్యులే అవుతారు.

ఇక ఇప్పుడు ఈ వ్యాసం యొక్క ముఖ్యోద్దేశం గురించి వ్రాస్తున్నాను.

ఈ సాహిత్య వేదిక కార్యక్రమంలో తరువాతి అంశంగా వెంకట్ నాగం గారు రచించిన “రచ్చబండ చర్చలు” మరియు “కలగూర గంప” పుస్తకాల ఆవిష్కరణ నా పర్యవేక్షణలో జరగడం నాకు ఎంతో తృప్తి నిచ్చింది. వ్యాస సంపుటిగా వెలువడ్డ ఈ రెండు పుస్తకాలు - సమాజం, జీవన విలువలు, సాంస్కృతిక అంశాలు, అనుభవాలపై రచయిత వెంకట్ నాగం గారి ప్రత్యేక దృష్టిని ప్రతిబింబిస్తాయని నా అభిప్రాయము.

వెంకట్ గారి విషయ సమీకరణ, సంగ్రహణ, విశ్లేషణ సామర్ధ్యం అత్యంత అద్బుతం, మెచ్చుకోదగ్గది. రచ్చబండ అనే శీర్షిక ద్వారా విలువకట్టలేని సమాచారాన్ని ఓపికగా స్వదస్తూరితో సిరిమల్లె పాఠకులకు అందించి నిజమైన సాహితీసేవకులు అనిపించుకున్నారు. ఈ రచ్చబండ లోని అంశాలను పరికిస్తే బహుశా పాత్రికేయ వృత్తిలో ఉన్న వారు కూడా ఇంత విపులంగా వ్రాయలేరేమో అని అనిపిస్తుంది.

పుస్తక ఆవిష్కరణ గురించి నేను మాట్లాడిన తరువాత పుస్తక రచయిత వెంకట్ నాగం గారు మాట్లాడుతూ తన రచనలకు స్ఫూర్తిగా నిలిచిన ఎన్నో తెలుగు దినపత్రికల సంపాదకీయం పేజీలు, అవి తనను ఎందుకు ఆకర్షించాయి, వ్యాసరచనకు కావాల్సిన ముఖ్య అంశాల ఎంపిక, పాఠకులతో అనుసంధానానికి అనివార్యమైన చక్కని ఉపోద్ఘాతం, నేపథ్యం, ప్రధాన వాదోపవాదనలు, లోతైన విశ్లేషణలు, సందర్భానుసారంగా చారిత్రాత్మక ఉదాహరణల ప్రస్తావన, విస్తృత ఆలోచనలు, చివరిగా వ్యాసానికి అనివార్యమైన సమగ్రమైన ముగింపు వంటి అంశాలను వెంకట్ నాగం గారు సోదాహరణంగా వివరించారు. ఈ సందర్భంగా పలు అంతర్జాతీయ తెలుగు సదస్సులలో పరిశోధనాపత్రాల సమర్పణకు విలువైన సూచనలు చేసి ప్రోత్సహించిన పద్మశ్రీ కొలకలూరి ఇనాక్ గారికి, 2023 నుండి రచ్చబండ చర్చల వ్యాస ధారావాహికలను ప్రోత్సహించిన సిరిమల్లె సంపాదకులకు, ఈ రెండు వ్యాస సంపుటి పుస్తకాలను ప్రచురించిన వంగూరి ఫౌండేషన్ అధినేత వంగూరి చిట్టెన్ రాజు గారికి, తన 25 ఏండ్ల సాహిత్య ప్రయాణానికి సహకరించిన సహధర్మచారిణి వాణి గారికి వెంకట్ నాగం గారు సభాముఖంగా ధన్యవాదాలు తెలిపారు.

ఈ సాహిత్య వేదిక కార్యక్రమం, ప్రవాస తెలుగు ప్రజలకు భాషతో అనుబంధాన్ని మరింత బలపరచడమే కాక, కొత్త రచయితలకు ప్రోత్సాహాన్ని అందించే వేదికగా నిలిచిందని ఈ కార్యక్రమంలో పాల్గొన్న ప్రతి ఒక్కరూ ప్రశంసిస్తూ మరిన్ని ఇటువంటి వేదికలను ఏర్పాటు చేయాలని నిర్వాహకులకు సూచించారు. స్థానిక గోంగూర గ్రూపు నుండి దివాకర్ - శ్రీదేవి సోమంచి, కృష్ణ కిషోర్, అబ్దుల్ షేక్ కమ్మని తెలుగు గీతాలను ఆలపించారు. కృష్ణ కిషోర్, శాంకరి తమ వ్యాఖ్యానంతో సభ ఆసాంతం వీక్షకులను ఆకట్టుకున్నారు.

ఈ సన్మాన మరియు పుస్తక ఆవిష్కరణ కార్యక్రమం దిగ్విజయం కావడానికి ముఖ్యకారకులై, కార్యనిర్వాహక సభ్యులైన శాక్రమెంటో తెలుగు సంఘం TAGS (Telugu Association of Greater Sacramento) చైర్మన్ నాగ్ దొండపాటి, అధ్యక్షుడు శ్యాం ఏలేటి, ఉప అధ్యక్షురాలు శాంకరి చీదెళ్ళ, జాయింట్ సెక్రటరీ శ్రీదేవి ఆళ్ళ మరియు ‘సువిధ ఇంటర్నేషనల్ సంస్థ’ తరపున అధ్యక్షుడు భాస్కర్ వెంపటి, సువిధ బోర్డు సభ్యులు బాలు, పద్మప్రియ, అవినాష్, ఇంకా పలువురు కార్యకర్తలు సహకరించారు. ఫాల్సమ్‌లోని స్థానిక రుచి రెస్టారెంట్ ఈ సాహిత్య సమావేశానికి ఆతిథ్యమిచ్చి - వడ్డించిన పసందైన విందు భోజనంతో నేటి కార్యక్రమం ముగిసింది. ఇది నిజంగా సిరిమల్లె పత్రికకు ఒక ప్రత్యేకమైన ఉనికిని, ఉన్నతస్థానాన్ని అందించిందని మా దంపతుల ఇరువురి భావన. తెలుగు సాహిత్యాన్ని ప్రేమించే ప్రతి ఒక్కరికీ ఈ వేడుక ఒక మరపురాని సాహిత్యానుభూతిని అందించిందని పలువురు వ్యాఖ్యానించారు. ఈ సందర్భంగా సిరిమల్లె సాహితీ విలువల పరిరక్షకుడు అయ్యగారి సూర్యనారాయణమూర్తి గారు, మరికొంతమంది ఆత్మీయులు మాకు పంపిన అభినందనల మాటలతో ఈ వ్యాసాన్ని ముగిస్తాను.