చతుర్దశ అధ్యాయం (చతుష్షష్టి యోగినీ వివరములు)
శ్లోకాలు: 110/2-120, సహస్రనామాలు: 535-600
సుగంధ పరిమళోపేతమైన పచ్చకర్పూర మిశ్రిత తాంబూల పూరిత ముఖము కల మాతకు వందనాలు.
దానిమ్మ పూవువంటి అరుణారుణ శోభలతో భాసిల్లు లలితా మాతకు ప్రణామాలు.
లేడి కన్నులవంటి సుందర విశాల నేత్రాలుకల మాతకు వందనాలు.
యావద్విశ్వాన్నీ మోహింపజేయునట్టి మోహినీమూర్తికి ప్రణామాలు.
మానవమాత్రుని కననేల ప్రాణి మాతృకలకు జననికన్న ముఖ్యులెవరుంటారు? అట్టి ‘ముఖ్య’కు వందనాలు.
మృడుడనగా శివుడు. అట్టి మృడుని ప్రియసతియైన మృడానీ దేవికి వందనాలు.
ద్వాదశాదిత్యులలో మిత్రనామమొకటి ఉంది. జీవకోటికి భాస్కరునికన్న మిత్రులులేరు. అట్టి మిత్ర స్వరూపిణికి వందనాలు.
సర్వకాల సర్వావస్థలయందు తృప్తి కలిగియుండు మాతకు వందనాలు.
భక్తజనులందరికీ ‘నిధి’వంటి మాతకు ప్రణామాలు.
సర్వులనూ నియంత్రణలో--అంటే అధీనంలో ఉంచుకొని శాసించునట్టి మాతకు ప్రణామాలు.
నిఖిలమైన-అంటే సమస్తమైన విశ్వాలకూ అధీశ్వరియైన దేవికి వందనాలు.
వాసనలు చతుర్విధాలు. 1.మైత్రి 2.కరుణ 3.ముదిత 4.ఉపేక్ష - వీటిచే ప్రసన్నురాలగునట్టి.. లభించునట్టి మాతకు ప్రణామాలు.
మహాప్రళయ వేళలో కూడ సాక్షిణిగా ఉండునట్టి మహాశక్తికి వందనాలు.
పరాశక్తి స్వరూపిణికి వందనాలు.
బ్రహ్మజ్ఞాననిష్ఠా స్వరూపిణికి వందనాలు.
భిన్న వృత్తిలేనిబుద్ధికి ప్రజ్ఞానఘనమని నామము. అట్టి స్వరూపముగా దేవికి వందనాలు.
పుష్పా ద్రాక్షాసవాదిమధువును పానంచేసి అలసయైయున్న దేవికి వందనాలు.
మదమత్త స్వరూపిణియైన శక్తికి ప్రణామాలు.
‘అ’ కారాదని ‘క్ష’ కారాంతంగాగల మాతృకావర్ణాలే స్వరూపంగాగల లలితాపరమేశ్వరికి వందనాలు.
మహోన్నతమైన, మహోత్కృష్టమైన కైలాసపర్వత శిఖరమే నిలయస్థానంగా కల దేవికి వందనాలు.
మృదువైన లత, తామరతూడులవంటి కోమలభుజాలు కల తల్లికి వందనాలు.
మహాత్ములుచే సైతం పూజింపబడునట్టి మహనీయమూర్తికి నమోవాకాలు.
దయయే స్వరూపంగా గల కరుణా స్వరూపిణికి వందనాలు.
కైలాసాధిపత్యానికి ‘మహాసామ్రాజ్య’మని అర్ధముంది. అట్టి మహాసామ్రాజ్యంతో తేజరిల్లునట్టి మహాదేవికి వందనాలు.