ద్వాదశ అధ్యాయం (మంత్ర విద్య, సిద్ధ విద్య స్వరూప అమ్మవారు)
శ్లోకాలు: 87-97, సహస్రనామాలు: 401-474
కుమార, గణపతులు వంటి బిడ్డలను కన్న మహా మాతృమూర్తికి నమోవాకాలు.
తుష్టిరూపిణికి వందనాలు.
పుష్టి స్వరూపిణికి వందనాలు.
బుద్ధి స్వరూపిణియై భాసిల్లునట్టి మాతకు ప్రణామాలు.
ధైర్య స్వరూపిణియై భాసిల్లునట్టి మాతకు వందనాలు.
సాంసారిక బాధలను దూరంచేసి శాంతిని ప్రసాదించునట్టి మాతకు ప్రణామాలు.
శుభప్రదమైన మాతకు నమస్కారాలు.
కాంతి స్వరూపమైన ఆ తల్లికి వందనాలు.
సర్వులనూ విశేషంగా భక్తజనులను ఆనందింపజేయునట్టి మాతకు ప్రణామాలు.
విఘ్నాలను-- అన్నింటినీ నాశనం చేసి భక్తజనులు మార్గాన్ని నిష్కంటకంగా ఉంచునట్టి దయామయికి కైమోడ్పులు.
జగత్తుకు ప్రకాశాన్ని ప్రసాదించు సూర్యచంద్రాగ్ని తేజోమూర్తులకు సైతం తేజస్సును ప్రసాదించి స్వతేజంతో ప్రకాశించునట్టి మాతకు వందనాలు.
సూర్య చంద్రాగ్నులే త్రినేత్రాలుగా గల ‘త్రినయన’ కు వందనాలు.
కామస్వరూపిణియై అంటే సర్వకామప్రదాయై సుందర విశాల నయనాలతో భాసిల్లు మాతకు ప్రణామాలు.
కన్యా స్వరూపిణి (సప్తవర్ష ప్రాయయగు కన్యను-- మాలిని అంటారు.)కి వందనాలు.
పరమహంస స్వరూపిణికి ప్రణామాలు. తురీయాశ్రమమైన సన్యాసాశ్రమంలో నాలుగు తరగతులు న్నాయి. అందులో తృతీయాశ్రమాన్ని పొందిన సన్యాసికి ‘హంస’ అని పేరు. అట్టి పరమహంసకు--పరమేశ్వరికి అభేదము.
యావద్విశ్వానికీ మాతృ స్వరూపిణియైన మాతృమూర్తికి వందనాలు.
మలయపర్వతం వాస స్థానం గల తల్లికి ప్రణామాలు.
అంగీకరించదగిన సుందరి ముఖం కలిగిన తల్లికి వందనాలు.
సర్వజనులను ఆకర్షించునట్టి పద్మ సదృశ సుందరమూర్తికి ప్రణామాలు.
సుందరమైన కనుబొమలు కల దేవికి నమస్కారాలు.
శుభప్రదమైన దివ్యమంగళమూర్తికి వందనాలు.
దేవతలందరికీ నాయికురాలైన మహాశక్తికి వందనాలు.
నల్లని కంఠభాగము కల మాతకు వందనాలు.
విశేష కాంతులతో ప్రకాశించునది- జ్ఞానప్రకాశంతో భాసిల్లునట్టి దేవికి వందనాలు.
లయవేళలో క్షోభిణీమూర్తిని దాల్చు తల్లికి ప్రణామాలు.
గ్రహించ వీలుకాని అత్యంత సూక్ష్మస్వరూపిణికి ప్రణామాలు.
జాలంధరీ పీఠంలో షష్ఠీ తిధి నిత్యం దేవతయగు వజ్రేశ్వరీ శక్తిరూపిణిగా భాసిల్లు పరమేశ్వరికి వందనాలు.
వామదేవుడనగా శివుడు వామదేవుని పత్ని కావున వామదేవి అట్టి జననికి వందనాలు.
అవస్థా త్రయాతీతురాలు వయస్సుకు అతీతరూపిణి అయిన మాతకు వందనాలు.
దేవతా గణాలలో ఒక గణమైన సిద్ధులకు నాయికయైన లేదా అష్టసిద్ధులకూ అధీశ్వరియైన సిద్ధేశ్వరికి వందనాలు.
సిద్ధులను ప్రసాదించునట్టి విద్యాస్వరూపిణికి వందనాలు.
సిద్ధులన్నింటికి మాతృస్వరూపురాలైన తల్లికి వందనాలు.
కీర్తి స్వరూపిణికి ప్రణామాలు.