శ్రీ శోభకృతు కు స్వాగతమంటూ
మరలి పోయింది శుభకృతు నామ వత్సరం
తరలి వచ్చింది తెలుగు సంవత్సరాది- ఉగాది సంబరం
వెరసి చైత్ర శుద్ధ పాడ్యమి నాటి పర్వదినం
దక్షిణాయణ – ఉత్తరాయణ పుణ్య కాల అనుసంధానం.

షడ్రుచుల మేళనం ఉగాది నాటి పత్యేక నివేదనం
పచ్చి మామిడి, చింతపులుపు, కారాల సమ్మిళితం
చెరుకు తీపి, వేప చేదు, వగరు ౘవుల సంకలనం
జీవితాన ఒనగూడు ఒడిదుడుకులకివి సంకేతం.

తిధి, వార నక్షత్ర కరణం- యోగం - పంచాంగ శ్రవణం
వాడ వాడలా జ్ఞాన ప్రచోదనం - కవి సమ్మేళనం
ఇంటింట గుమ్మానికి అలంకృతం - లేలేత ఆమ్ర పర్ణ తోరణం
ఆకర్ణాంతమ్ అమృత సేవనం - కలకూతల కోకిల సుస్వర గానం.

యుగ యుగాల సంధి ఉగాది
వచ్చి పోతుంది ప్రతి ఏడాది
తెలుగు వారింటి ప్రియ అతిధి ఉగాది
ఆంధ్రుల సాంస్కృతిక పెన్నిధి ఉగాది.

శ్రీ శోభకృతు నామ సంవత్సర ఉగాది శుభాకాంక్షలు!!!!