ద్వాదశ అధ్యాయం (మంత్ర విద్య, సిద్ధ విద్య స్వరూప అమ్మవారు)
శ్లోకాలు: 87-97, సహస్రనామాలు: 401-474
మనస్సుకు, వాక్కుకు గోచరించనిది, అందనిదియై అతీత స్వరూపిణికి వందనాలు.
అజ్ఞానాన్ని దూరం చేయగల విద్యకు చైతన్యమని పేరు, ఆ చైతన్యానికే చిచ్ఛక్తి నామం ఉంది. అట్టి చిచ్ఛక్తి స్వరూపిణికి ప్రణామాలు.
చైతన్య స్వరూపిణియై తేజరిల్లు జగదంబకు వందనాలు.
బ్రహ్మశక్తి ద్వారా ప్రభవించునట్టి జడసృష్టి స్వరూపిణికి ప్రణామాలు.
కంటికి కనిపించునట్టి నామరూపాత్మకమైన జడసృష్టి ఆత్మగా గల తల్లికి వందనాలు.
గానం చేయువారిని తరింపజేయునది గాయత్రి, వేదజననియు గాయత్రి. అట్టి గాయత్రీ స్వరూపిణికి ప్రణామాలు.
విశేష మంత్రరూపము గల వ్యాహృత స్వరూపిణికి వందనాలు.
సూర్య సంబంధిత బ్రహ్మ పదార్ధ విశేషాన్ని కి ‘సంధ్య’ అని నామము. సంధికాలంలో అంటే ఉదయ, మధ్యాహ్న సాయంకాలాలలో సంధి వేళలో ఉపాసింపదగిన సంధ్యాస్వరూపిణికి వందనాలు.
ద్విజపరివారాలచే ఆరాధించబడునట్టి లేదా సేవింపబడునట్టి తల్లికి వందనాలు.
తత్త్వనామకమైన యోగపీఠమే ఆసనంగా కలిగిన తల్లికి వందనాలు.
సర్వుల మనోబుద్ధులలో సంచరించునట్టి తల్లికి నమస్కారాలు.
పరమేశ్వరివైన తల్లీ నీకు వందనాలు.
సర్వులకూ మాతృ స్వరూపిణియై భాసిల్లు మహాదేవికి వందనాలు.
అన్నమయ, ప్రాపుమయ, మనోమయ, విజ్ఞానమయ, ఆనందమయ నామకమైనా పంచకోశాంతరాలతో తేజరిల్లునట్టి సర్వశక్తి స్వరూపిణికి ప్రణామాలు.
హద్దులు లేని అంటే అపారమై మనోవాగతీతమైన మహిమలుకల తల్లికి వందనాలు.
సర్వవేళలా, సర్వకాలాలలో సదాసర్వదా యౌవనమూర్తిగా ఉండునట్టి మాతకు ప్రణామాలు.
ఆనందోత్సాహాలతో భాసిల్లునట్టి మాతకు ప్రణామాలు.
మదంవల్ల ఘూర్ణించగా ఎర్రవారిన నేత్రాలు కల మాతకు నమస్కారాలు.
కస్తూరి, పాటలాలతో చిత్రించబడడంవల్ల ఎరుపు తెలుపు రంగులలో ప్రకాశించుచున్న గండస్థ కల తల్లికి వందనాలు.
చందన ద్రవంచే లేపితమైన దివ్యాంగాలు కల మాతకు వందనాలు.
చాంపేయ పుష్పాలయందు విశేషమైన ప్రీతిగల మాతకు వందనాలు.
సృజన కార్యంలో చాతుర్యం-- కౌశల్యం కల జననికి నమస్కారాలు.
సుకోమలమైన రూపం కల తల్లికి వందనాలు.
శ్రీ చక్రంలో తేజరిల్లునట్టి కురుకుళ్ళాదేవీ స్వరూపిణి అయిన మాతకు ప్రణామాలు.
సజాతీయమైన మాతృకాబృందానికి కుళమని నామమున్నది. అట్టి బృందానికి అధీశ్వరీ అయిన జగజ్జననికి వందనాలు.
మూలాధారంలో స్థిరమైయుండు కులకుండము నివాసస్థానంగా గల తల్లికి ప్రణామాలు.
కౌళమార్గంలో తత్పరులైన వారిచే విశేషంగా సేవింపబడు మాతకు ప్రణామాలు.