శ్రీకర శుభకర సొదలు సేకరించి
చిలువలు పలువలును చేసి చెంగలించి
సొల్లు విషయాలు సారించి సొబగులిచ్చి
మాటలల్లి మంచి చెడుల బాట జూపు
వేదిక గదరా తెలుగిళ్ళ వీధి యరుగు
వీధి యరుగుతో పల్లెకు వీడలేని
బంధముండు పిల్లలు పెద్దలందరచట
కూడి వేడి వాడి కబుర్లు కూర్మితోడ
ముచ్చటింతురు మాపులు ముదము మీర
రాజకీయాల రచ్చకు రoకు బొంకు
ఊసులకది నెలవు సదా యూరి నందు
పిల్లలు పగలు మాపుల పెద్దలంత
వాద ప్రతివాదముల కూర్చు వేదశాల
బోసిపోయెనకట మూగబోయెనయ్య
ఉమ్మడి కుటుంబములు లేక నూరిలోన
అవ్వ తాత దండ్రుల నాటి యరుగు నేడు
మిగిలె నేకాకిగా పల్లె సొగసులరుగు
జ్ఞాపకాలు మిగిలె కొన్ని జాడలందు
పెంకు టిల్లులు పోయెను పెద్ద మేడ
లాయె కూలెనుగ యరుగులానవాలు
ఊరు కెళ్ళినపుడు వెత లోల లాడు
****************
వసంత కాలపు పుడమి గర్భాన వికసించిన చిగురులను పూలను చూశాను
యవ్వన గీష్మాన కష్టాల కడలి ఇసుక తీరాల ఎండమావులను చూశాను
శ్రావణ మేఘాల చాటున కౌమారపు తలపుల వలపు చిరుజల్లులతో తడిసి పోయాను
కార్తీక మాసపు కోవెల గంటల ఘణ ఘణల మది మురియగా శరదృతువు పండువెన్నెల బొండు మల్లెల పరిమళాల తొలి కౌగిళ్లను చవి చూశాను
హేమంత గాలుల పుష్య మాసపు మంచు తెరల వయసు మడత పొరల జీవిత దుప్పటిలో ఒదిగిపోయాను
అదిగో వచ్చేసాయి నా మల్లి జీవన సాఫల్య ఫలితాలు
అన్ని ఋతువులు సెలవు తీసుకున్నాయి
ఒక్క శిశిరం నా వెంటనoటి ఉంది
అడవిలోని నదీ ప్రవాహంలో తెరచాపలేని నావ ఊగిసలాడుతుంది
అలలు వయసు మీరి నిట్టూర్పుతున్నాయి
గాలితో అనుభవాల మనసు పిచ్చిగా ఈలలు వేస్తుంది
అక్కడ వ్యర్ధమైన వాడిన పూలు నేలంతా మలి సంధ్య సిందూరాలను తలపిస్తున్నాయి
క్రీనీడలలో పండుటాకులు రాలి గాలికి అటు ఇటు కొట్టుకుపోతున్నాయి
ఆవలి ఒడ్డు నుండి
ఆవల తీరం నుండి
ఈ మలయ మారుతంలో
నాకోసం ఏవో వేడికోళ్లు
ఏవేవో సుస్వరాల వీడికోళ్లు
నన్ను రమ్మంటున్నాయి మీకు వినిపించడం లేదా!?
అవునులే మీకు సమయం ఇంకా ఉంది కదా