కృష్ణం కలయ సఖి సుందరం బాల కృష్ణం కలయ సఖి సుందరం

కృష్ణం కలయ సఖి సుందరం బాల కృష్ణం కలయ సఖి సుందరం
కృష్ణం కథవిషయ తృష్ణం జగత్ప్రభ విష్ణుం సురారిగణ జిష్ణుం సదా బాల- కృష్ణం కలయ సఖి సుందరం
నృత్యంతమిహ ముహురత్యంతమపరిమిత భృత్యానుకూలం అఖిల సత్యం సదా బాల -కృష్ణం కలయ సఖి సుందరం
ధీరం భవజలభారం సకలవేదసారం సమస్తయోగిధారం సదా బాల -కృష్ణం కలయ సఖి సుందరం
శృంగార రసభర సంగీత సాహిత్య గంగాలహరికేళ సంగం సదా బాల -కృష్ణం కలయ సఖి సుందరం
రామేణ జగదభిరామేణ బలభద్రరామేణ సమవాప్త కామేన సహ బాల -కృష్ణం కలయ సఖి సుందరం
దామోదరం అఖిల కామాకరంగన శ్యామాకృతిం అసుర భీమం సదా బాల-కృష్ణం కలయ సఖి సుందరం
రాధారుణాధర సుతాపం సచ్చిదానందరూపం జగత్రయభూపం సదా బాల -కృష్ణం కలయ సఖి సుందరం
అర్థం శితిలీకృతానర్థం శ్రీ నారాయణ తీర్థం పరమపురుషార్థం సదా బాల -కృష్ణం కలయ సఖి సుందరం”

మంగళంపల్లి వారు ఈ తరంగం పాడుతూంటే, ఆ శ్లోక గీతం వినే చెవులకు ఎంత ఇంపుగా వుంటుందో చూడండి. లింక్ »

క్లుప్తంగా భావము
కాంచుమా సఖీ కృష్ణడు ఎంత సుందరుడో!
ప్రపంచ వైభవానికి కారకుడై కూడా దానికి అతీతుడై ఉంటాడు, దేవతా విరోధులు అణచివేస్తూ ఉంటాడు, బాల కృష్ణుడు.
సత్య స్వరూపుడై, కాలాతీతుడై, కరుణామయుడై, భక్తులతో దేవమయ నృత్యంలో లీనమైయుండే బాలకృష్ణుని అందం చూడుడే!
ప్రాపంచిక భారజలధికి అతడు తీరం, సమస్తయోగులకు ఆధారం,
శృంగార రసభర సంగీత సాహిత్య గంగా లహరులకు అతడు సంగం,
నల్లని వాడు, జగదభిరాముడు, బలభద్ర దేవుడు, అందరికి ప్రియతముఁడు,…   ఈ విధంగా సాగిపోతుంది.

మన చిన్నప్పుడు అమ్మమ్మలు, నాయనమ్మలు తాము ఆనందిస్తూ ఈ పాటలు మధురంగా పాడుకుంటూంటే వాటి అర్ధం అప్పుడు స్పష్టంగా తెలియకపోయినా (ఆ మాటకి వస్తే ఇప్పటికీ అదేస్థితి), ఆ సరళమైన పద గుంఫనమునకు, లాలిత్యానికి, ప్రాసల ప్రక్రియకి తన్మయాన్ని అనుభవిస్తూ, ఆనందించిన వాటిలో కొన్ని పాత పాటలు నారాయణ తీర్థులవారి తరంగాలని వాళ్ళు వివరించి చెబితే తప్ప అప్పుడు మనకు తెలియదు. పెద్ద అయ్యాక అవి వినిపించేవాళ్లు లేక, ఉన్నా మనకి అంతసులభంగా కొరుకుపడని సంస్కృతంలో ఉన్న గీతాల గురించి తెలుసుకోవాలన్న పిపాస కరువయ్యి గాని, కాలం కొరవడిన నెపంతో  గాని  ఆ ప్రయత్నానికి దగ్గరకు రానీయదు. నారాయణ తీర్థులు తెలుగువాడే అయినా, సంస్కృతంలో వ్రాసి అందరూ పాడుకునేటట్లుగా పన్నెండు తరంగాలలో వెనుక ఉండే ఆత్మ శ్రీకష్ణ పరమాత్ముడే! ఆయన చెరసాలలో జన్మించిన మొదలు రుక్మిణీ కళ్యాణం వరకు శ్రీ కృష్ణ లీలా గాథల గీత లహారులే. భగవానుని అవతారాలలో శ్రీ కృష్ణావతారం అత్యంత రసమయమై, వివిధ ఆకర్షణీయ ఇతివృత్తాలతో మనోహరంగా వికసించి ఆనందావధులని స్పృశింపచేస్తుందని మన కందరికి తెలుసు. నారాయణతీర్థుల తరంగాలు గీత లాలిత్యానికి, పదబంధానికి, భావపరిణతికి ప్రసిద్ధము.

ఈ ‘తరంగాల’ రస స్ఫూర్తి నాట్యాచార్యులచే బహుళ నాట్యరీతులలో మలచబడి, నాట్య విదుషీమణుల భావోత్ప్రేక్షకి, పాడేవారి సంగీత బాణిలో పొడగబడి, ప్రేక్షకుల భావావేశాలలో మధించబడి, అందరిని ఉన్నత లోకాలలో ఓలలాడించి కదుపుతుంది.

నారాయణ తీర్థుల పూర్వాశ్రమంలో ఆయన తలిదండ్రులొసగిన జన్మ నామం తల్లావఝుల గోవింద శాస్త్రి (క్రీ.శ 1650-1745). మంగళగిరి దగ్గర ‘కాజా’లో పుట్టి పెరిగి, సంస్కృతము లోను (పురాణాలు, శ్రీమద్భాగవతాలలో ఔపోసనం పట్టి), సంగీతంలో పాండిత్య ప్రకర్షని పొంది, నాట్యశాస్త్రాన్ని క్షుణ్ణంగా శోధించి సకల విద్యాపారంగతుడయ్యాడని పించుకుని, అంతటితో తృప్తిచెందక, కాశీ నగరానికి చేరి అక్కడి పండిత శ్రేష్ఠులతో కూడి చర్చించి, తన పాండిత్యాన్ని పెంచుకుంటూ వారికీ పంచాడట. చిన్నతనం నుండి పట్టుకుని పీడిస్తుండే 'పరిణామశూల' (విపరీతమైన కడుపులో నొప్పి)  పోగొట్టుకునేందుకు సింగరాయకొండ లోని నృసింహస్వామి ఆలయంలో 40 రోజులు ప్రదక్షిణం చేసి ఆ బాధపోగట్టుకుని అక్కడే 'తరంగ' రచన ప్రారంభించారట. ఒకరోజున అత్తవారిల్లు చేరుకునేందుకు ఉధృతం గా ప్రవహిస్తున్న కృష్ణ నది దాటబోతూ సుడిగుండంలో చిక్కుకుని ప్రాణరక్షణకోసం ఆపద్ధర్మ సన్యాసం పుచ్చుకుని, పిమ్మట భార్యానుమతితో  కంచీపురం చేరి అచ్చట శివరామ తీర్థుల వద్ద శాస్త్రోక్తంగా సన్యాసం పుచ్చుకుని దేశాటనం  చేస్తూ అనేక పుణ్యక్షేత్రాలు దర్శించి చివరికి కావేరి నదీ తీరానున్న ‘వరహురు’ లో స్థిరపడి అక్కడే దేహ విముక్తిని పొందాడట.

'శ్రీ కృష్ణ లీలాతరంగిణి' అనే నృత్య సంగీత రూపకావ్యాన్నిఅకుంఠిత కృష్ణ భక్తి తో కూర్చి, పాడి, అతడి ఆధ్వర్యంలోనే హావభావాలతో నాట్య ప్రదర్శన చేయించాడట. ఆ గ్రంధాన్ని పండ్రెండు ‘తరంగాలు’గా విభజించిన ఈ నాట్య కళారూపక మేలు కావ్య సంపుటి 34 రాగాలలోను, 9 తాళాలలోను, 17  వివిధ ఛందస్సులలోను 153  శ్లోక గీత 'తరంగాలు’ గా కూర్చి 31 'చూర్ణిక' లతో (సులభ శైలిలో లిఖించే వచన సంపుటిలు)  వాటిని నృత్య, నాట్య గీతాలలో వాడుకునే రీతిలో అనువుగా మలచి వాటికి ప్రాచుర్యాన్ని కలిగించాడు. ఇవే కాకుండా 15 పుస్తకాలు వాసి (వీటిలో కొన్ని కాశీ 'విశ్వవిద్యాలయ గ్రంధాలయం' లో ఉన్నాయి) ప్రతిభను చాటాడు. అతడు వ్రాసిన 'పారిజాతాపహరణం' తంజావూరు 'సరస్వతి మహల్ గ్రంధాలయం' లో అనేక పురాతన తాళపత్ర గ్రంధాలతో బాటు ఉన్నది.