సూర్యుఁడు సర్వసృష్టికిఁ బ్రచోదనుఁడై యుదయించు నిత్య మా
అర్యముఁడే కదా గ్రహము లన్నిటికిన్ దగు నాథుఁ డౌచు నే
చర్యలకైన సాక్షి యయి చక్కని పచ్చదనంబుఁ బెంచి సౌం
దర్యము గూర్చి భుక్తి నిడు ధాత్రి వసించెడి ప్రాణికోటికిన్ 1

ప్రాణాధారజలంబు భూతలముఁ జేరన్ వార్ధినీరంబులన్
తానే యాతపశక్తి నావిరిగ మింటన్ జేర్చు మేఘాలుగా
వానల్ గొండల భూములన్ బడి స్రవింపన్ దాహమున్ దీర్చుచున్
భానుం డీ సమతుల్యకారకునిగా వర్తించు నిత్యం బొగిన్(1) 3
............(1) విధిక్రమముగా

ఆరోగ్యంబు నొసంగు సూర్యకిరణా; లాకాశసామ్రాట్టుగా
తేరున్ దీరుగ నెక్కి సాగు రవి దీప్తిన్ వ్యాప్తిఁ జెందించుచున్
సారం బెంతయొ గూర్చు వృక్షములకున్ బత్రాతపస్నేహ(1) మే
పారన్(2); జీవుల కెల్ల శ్రీకరుఁడు(3) ప్రత్యక్షంబుగా నర్కుఁడే(4) 4
............(1) ఆకులకు సూర్యరశ్మికి మధ్య మైత్రి
............(2) ఏపారన్ = వృద్ధిపొందగా
............(3) విష్ణువు / శుభములు కలిగించువాడు
............(4) అందఱిచే అర్చింపబడువాడు (సూర్యుడు)

దినకరుఁ డను నామంబే
దినచర్యకు నాందిపలుకుఁ; దిరుగుచు హనుమన్
తనదిశకు మొగము నుంచుచు
కొనుమని బోధించె విద్య గురువర్యుండై 5

ఆదిత్యు హృదయ మందున
సాదరముగ జప మొనర్చి(1) యనితరజయమున్
మోదింప విశ్వ మంతయు
నాదరణీయుండు రాముఁ డని(2) సాధించెన్ 6
............(1) అగస్త్యమహాముని ఉపదేశించిన ఆదిత్యహృదయమును
..................జపించి
............(2) యుద్ధములో

ప్రతియొకరికిఁ దా నొకఁడై
ప్రతినిమిషముఁ గానుపించు రవి దైవంబై
ప్రతిదినమున; ప్రారంభము
ప్రతిభాన్వితభవిత కెపుడు ప్రత్యూషంబే(1) 7
............(1) ప్రాతఃకాలమే

తనశాక్త్యావశ్యకతను
తనహద్దులు మీఱి పెంచి, తగిన యుపాయం
బని పునరుత్పాదకశ
క్తిని(1) మనుజుం డాశ్రయించెఁ దృప్తియె కఱవై 8
............(1) Renewable Energy

అందున సౌరశక్తి యొక యద్భుతసృష్టివరంబు గాఁగఁ దా
నందఱికిన్ లభించుగతి నా రవి నిత్యము మండి పంచఁగా
నెందఱు తా మెఱింగి యిది యించుక మెత్తురొ? గౌరవంబుతో
ముందఱ నిల్చి మ్రొక్కెదరొ? ముందుకు మన్గడకీలకం బిదే 9

భువి శిలాజేంధనమ్ముల(1) పొగలు(2), సెగలు(3)
చనఁగ స్వచ్ఛమ్ము(4) నగ్గువౌ(5) శక్తి నొసఁగు
సౌరఫలకాల(6) నెలకొల్పె శ్రద్ధ తోడ
మానవుఁడు; సూర్యకృపలేక మనువు గలదె? 10
............(1) Fossil fuels (2) Air Pollution
............(3) Thermal Pollution (4) Clean
............(5) అగ్గువ+ఔ = Less costly (6) Solar Panels