ప్రథమ అధ్యాయం
(అమ్మవారి స్థూలరూప వర్ణన) శ్లోకాలు: 01-21, సహస్రనామాలు: 01-54
వేయిమంది బాలభాస్కర ప్రభలతో తేజరిల్లు తల్లికి వందనాలు.
చతుర్భుజాలతో భక్తజన సంరక్షణ చేయు తల్లికి వందనాలు.
వామపార్శ్వోపరిహస్తములో రాగరూపపాశాన్ని ధరించిన తల్లికి వందనాలు.
దక్షిణ పార్శ్వోపరిహస్తలలో క్రోధరూపాంకుశాన్ని ధరించి తేజరిల్లునట్టి మాతకు నమస్కారాలు.
మనోరూపమైన చెఱకు విల్లును క్రింది ఎడమచేత ధరించిన శ్రీ లలితకు వందనాలు.
శబ్దస్పర్శరూప రసగంధాలను పంచతన్మాత్రలంటారు. ఆ తన్మాత్ర పంచకమే దేవివామభాగంలోని క్రింది హస్తంలో పంచభాగాలు భాసిల్లుతున్నాయి. అట్టి బాణాలను ధరించిన తల్లికి వందనాలు.
తన అరుణ శరీరకాంతుల ద్వారా బ్రహ్మాండమండలాన్ని తేజరిల్లజేయునట్టి తల్లికి వందనాలు.
చంపకాశోక పున్నాగ సౌగంధిక పుష్పగుచ్ఛాలతో ప్రకాశించుచూ గుబాళించుచున్న కచభాగంగల దేవికి వందనాలు.
కురువిందమణి శ్రేణులతో ప్రకాశించు కిరీటాన్ని ధరించిన దేవికి వందనాలు.
సమానార్ధ భాగమైన భో సీమను ప్రకాశింపజేయునట్టి అష్టమీ చంద్రశోభలతో రాజిల్లు లలాటసీమ గలిగిన తల్లికి నమస్కారాలు.
చంద్రబింబంలోని మచ్చవలె చంద్రబింబానన అయిన తల్లి ఫాలభాగంలో కస్తూరీ తిలకంచే భాసిల్లునట్టి తల్లికి వందనాలు.
లలితవదన సీమ మన్మధుని మంగళగృహంలా ఉన్నది. అట్టి గృహానికి ఆమె కనుబొమలే మంగళతోరణాలుగా ప్రకాశించ అట్టి మంగళమూర్తికి నమోవాకాలు.
వదన లక్ష్మీ ప్రవాహంలో ప్రకాశిస్తూన్న మీనాలవంటి నయనాలు కల తల్లికి వందనాలు.
నూతనంగా వికసించిన సంపెంగ పుష్ప సమాన నాసిక గల తల్లికి వందనాలు.
తారలకాంతిని తిరస్కరించిన కాంతితో ప్రకాశించుచున్న అడ్డబాసను ధరించిన దేవికి వందనాలు.
కదంబ పుష్పమంజరితో మనోహరంగా ఉన్న కర్ణభాగంకల తల్లికి వందనాలు.
సూర్యచంద్రులవలె భాసిల్లునట్టి తాటంకయుగళాన్ని ధరించి తేజరిల్లు శ్రీ దేవి నమస్కారాలు. సూర్యచంద్రులనే తాటంకాలుగా ధరించగలిగిన మహామహిమాన్వితకు ప్రణామములని విశేషార్ధము.
అద్దముకన్న నునుపుగా ఎదుటివస్తువులను ప్రతిఫలింపజేయునంతటి స్వచ్ఛముగను, పద్మ రాగమణి ప్రభలవలె అరుణారుణంగా తేజరిల్లుతూన్న కపోలాలు కల పరమేశ్వరికి వందనాలు.
నవ్యంగా ఉదయించిన పగడపు తీగవలె నున్నగాను, చక్కగా పండిన దొండపండువలె ఎఱ్ఱగాను ఉన్న పెదవులుగల పరమేశ్వరికి వందనాలు.
షోడశాక్షరీ మహామంత్రంలోని పదహారు అక్షరాలే -- శివశక్తి భావంతో 16+16 ముప్పై రెండు దంతాలుగల జననికి వందనాలు.
దేవి వేసికొన్న కర్పూరమిశ్రిత తాంబూల పరిమళించే దిగంతరాలు ఆకర్షించబడుచున్నవి. అట్టి శ్రీదేవికి వందనాలు.
శారదాదేవి వాయించు కచ్ఛపీ వీణానాదాలను తిరస్కరించునట్టి నిజమాధుర్య సల్లాపాలుగల తల్లికి వందనాలు.
తన చిరునవ్వుల కాంతిపుంజాలచే ముంచుచున్న కామేశ్వరుని మనస్సు కల శ్రీమాతకు వందనాలు.
అసామాన్యమైన గోళాకృతిలోనున్న చుబుక(గడ్డము) భాగముచే తేజరిల్లు దేవికి వందనాలు.
కామేశ్వరునికి కట్టబడిన మంగళసూత్రంతో కూడి సుందరగళసీమతో భాసిల్లు దేవికి వందనాలు.
Very clear explanation!!