నైఋతి లింగం దాటి సూర్య లింగం వద్దకి చేరుకున్నాము. అంటే మూడోవంతు నడక అయినట్లే. ఈ గుడి (పై కట్టడం కాదు; అసలు గుడి) ద్వారం ఎత్తు చాలా తక్కువగా ఉన్నది. పూజారి లోపలకి వెళ్లాలన్నా వంగి కష్టంగానే వెళ్ళాలి. లింగం కూడా చిన్నగా ఒక అడుగు ఎత్తులోనే ఉన్నది. అక్కడ ఒక అమ్మాయి పూలమ్ముతుంటే కొని లోపలకి వెళ్లి దర్శనం చేసుకున్నాము. ఎందుకు ఇంత తక్కువ ఎత్తు ద్వారం అని అడిగితే, సూర్యుడు ఏడాదికి 6 నెలలు ఈ గుడిలో లింగం  మీదకి నేరుగా ప్రసరిస్తాడుట. ఆ సూర్య రశ్మి సరిగ్గా లింగం పానుమట్టం మీద, అంటే పాదాల మీద పడుతుందట. ఆ ద్వారం లోంచి సరిగా అలా పడుతుంది కాబట్టి అది ఈ సూర్య లింగ విశేషం. ఈ సూర్య లింగం తరువాత వరుణ లింగం, ఆ తరువాత వాయు లింగం చూసాము. ఆ తరువాతనే నాకు ఇక్కడ ఇంకొక అనుకోని విశేషమైన అనుభూతి కలిగింది. మొత్తం 8 ప్రధాన లింగాలని చెప్పాను కదా? ఈ వాయు లింగం తరువాత ఎడమ చేతి పక్కన ఒక కట్టడం ఉన్నది కానీ, ప్రతి లింగ ఆలయం ముందు ఉన్నట్లు బోర్డు లేదు. మేమూ ఏమీ ఆలోచించకుండా ముందుకి వెళ్లబోయాము. ఇది ఇంకా 6, లేక 6.30 అయిందేమో. జన సంచారమేమీ లేదు. ఎదురుగా ఎవరూ లేరు కూడా. అయినా ఎవరో అకస్మాత్తుగా మా ముందరకి వచ్చాడు. అసలు అంత  దగ్గరగా నేను చూడకుండా వచ్చాడని నేననుకునే లోపల ఆయన, "మీరు చంద్ర లింగ దర్శనం చేసుకోకుండా ఎందుకు ముందుకు వెళుతున్నారు? అని ఎడమ చేతివైపున్న ఆ కట్టడం చూపించాడు. నేను అది చూసి, రెడీ గా ఉన్న ఫోనుతో ఒక ఫోటో తీసి ధన్యవాదాలు చెపుదామని ఆయన కోసం చూసాను. అక్కడ సందులేమీ లేవు, రోడ్డులో ఇంకొకరెవరూ లేరు. అయినా నాకు ఆయన కనిపించలేదు! నేను ఆశ్చర్యపోయాను. కలయ చూసి, ఈశ్వరుడే మమ్మల్ని ఆజ్ఞాపించాడని అనుకుని లోపలకి వెళ్లి చంద్ర లింగ దర్శనం చేసుకున్నాము.  ఇప్పటికి బాగా తెల్లవారింది, ఎండ వెంటనే తన ప్రతాపం చూపించడం మొదలు పెట్టింది. అక్కడ నించి కుబేర లింగం చేరుకొని దర్శనం చేసుకున్నాము. ఆ మధ్యలో దాదాపు 4, 5 వేరే గుళ్ళు చూసాము. వరుణ లింగం నించి వాయులింగం దాకా ఉన్న ప్రాంతాన్ని ఆది అన్నామలై అంటారు. మలై అంటే తమిళంలో కొండ అని అర్థం. తిరు అంటే 'శ్రీ ' అన్నమాట.

ఆఖరి లింగం ఈశాన్య లింగం. ఇది మెయిన్ రోడ్డుకి ఎడమచేతి వైపున్న రోడ్డులో ఉంటుంది. పట్టించుకోకపోతే కనబడక పోయే ప్రమాదం ఉన్నది. ఈ లింగం భూమట్టానికి కొంచెం కిందకి ఉంటుంది. పెద్ద లింగం, ఆలయం కూడా కొంచెం పెద్దదిగా ఉంటుంది. అక్కడ దర్శనం చేసుకుని మళ్ళీ అరుణాచలేశ్వరుడి ఆలయానికి చేరుకున్నాము. రోడ్లు, ఆలయంలో బండలు అన్నీ మండిపోతున్నాయి. చెమటలే చెమటలు.

ఇది చాలా పెద్ద ఆలయం. ప్రధాన ఆలయం ముందర సుబ్రహ్మణ్య స్వామి ఆలయం ఎడమవైపు ఐమూలగా ఉంటుంది. అంటే ఇంకెక్కడా ఉండనట్లు ఒక కోణంలో ఉంటుంది. అది తమాషా అనిపించింది నాకు. ఒకవేళ ప్రధాన ఆలయం కట్టాక కొంత కాలానికి కట్టారేమో అనుకున్నాను. లోపలకి వెళితే మొత్తం - 3 ప్రాకారాలు - శివాలయం ముందు ఎడమవైపు పెద్ద విఘ్నేశ్వరాలయం ఉన్నది. వినాయకుడి విగ్రహం చాలా గొప్పగా, దాదాపు 8, లేక 9 అడుగుల ఎత్తున ఉన్నది. అక్కడ చాలా గొప్పగా పంచామృత అభిషేకం చేస్తున్నారు స్వామివారికి. చాలా బాగా చేస్తున్నారు. అక్కడ కూర్చుని చూసి, తరువాత టికెట్టు తీసుకుని లోపలకి వెళ్ళాము. నమ్మండి, అంత నడిచి వచ్చి, కడుపు నక నక లాడుతున్నా, చెమటలు కారిపోతున్నా రద్దీవల్ల  అలా రెండున్నర గంటలు లైన్లో నిలుచున్నాము. అప్పుడు దర్శనం కలిగింది. ఈశ్వరుడు కనబడాలంటే మనం అంత మాత్రం వేచి ఉండాలని, దర్శనం చేసుకుని, పక్కనే ఉన్న అమ్మవారి కోవెల లో అమ్మవారి దర్శనం కూడా అలాగే తోసుకుంటూ చూసి, హోటలు చేరుకున్నాము. ఈ ఆలయం చాలా పెద్దది. దీని గురించి వచ్చే నెల  రాస్తాను.

చెప్పటానికి చాలా ఉన్నది ఇంకా. కాబట్టి ఈ అరుణాచలం దర్శనం రెండు మూడు సంచికలుగా రాయాలని అనుకుంటున్నాను.