నిద్ర
ఎక్కడికి పోయింది నా నిద్ర?
రహస్యంగా తన్నుకుపోయిందెవరు?
తెలియకుండా గదిలోకొచ్చి
కళ్ళను మోసగించిందెవరు?
ముఖంలోకి మొరటుగా చూసిన
ఆ నల్లని భాష ఎవరిది?
గంటకోసారి చప్పుళ్లతో
జామును ఆక్రమించే గతమేమిటి?
మెదడుపై ఆ గుర్తులెవరివి?
చెవులకు వ్రేలాడుతున్న వింత వార్తలేమిటి?
గుండె గోడల పక్కన తొంగి చూసేదెవరు?
ఊపిరికడ్డంగా నిలబడిందెవరు?
ఆకలిని చంపేసి, దప్పిక తీరని
ఆ ఆలోచన రూపమెవరిది?
రాత్రి రుచిని దూరం చేసి
మనసును మోసం చేసేదెవరు ?
రాత్రిని ఎంత వెదికినా
కునుకు కనిపించక ఏమైపోయినట్లు?
నన్ను లాక్కొచ్చి నా యెదుట
ముద్దాయిగా నిలబెట్టిన ప్రశ్నెవరిది?
ఎక్కడికి పోయింది నా నిద్ర?
నాపై ఈ కుట్ర ఎవరిదో? ఎందుకో?