దేశం “మొబైల్”
అందరూ వాడుకోవా లంటే
టాక్స్ “కార్డు” వేయాలి,
శ్రమ “చార్జ్” చేయాలి.

అభ్యర్ధికి దండలుగా
బలి పువ్వులు ఎన్నో,
రేపు గెలిచొస్తే
అమ్మో, ఎన్నెన్నో.

ఇంట్లోనో రోడ్డుమీదో
పడితే బాగుపడతావు,
ఆత్మీయుల మనసుల్లోంచి
పడకు - పగిలిపోతావు.

మనసు యంత్రానికి
చిరునవ్వు కావాలి,
కాని ఆ “ఆయిల్”
కల్తీ కారాదు.

ఇద్దరి అహంకారాలవల్ల
“కారం” పెరిగిపోయి
ఆంధ్రప్రదేశ్ పసికందుకు
ఒళ్ళు మండిపోతోంది!

ఎండకంటే వానకే
భయపడతారు మనుషులు,
తగిలేలా మంచి చెబితే
దూరంగా పారిపోతారు.

అవయవా లన్నీ
మనసుకు బిగించబడ్డాయి,
అక్కడ లూజయితేనే
ఏదైనా బూజు పట్టేది.

పళ్ళు నూరీ నూరీ
ఊడిపోయాయి ప్రతిపక్షానికి,
కళ్ళు ఉరిమీ ఉరిమీ
మూసుకుపోయాయి అధికారానికి.

బందెల దొడ్డిలో
గొర్రెల్లా నక్షత్రాలు,
రాత్రితో ఒప్పందం
“నాన్ వెజిటేరియన్” చంద్రుడు.

దొంగల్ని చంపేస్తానని
కుక్క కెన్ని అరుపులో,
కట్టిన గొలుసు విప్పాను
నోరు పెగల దెందుకో!