సింహపురి మా ఊరు
రాజకీయ సింహాలకిది జాగీరు
మొలగొలకులకు పెట్టింది పేరు
నెల్లూరు అసలు పేరు నెల్లి ఊరు
ఇట తిక్కన తెనిగించెను మహాభారతం
మనుమసిద్ధి పాలించిన ఘన చరితం

శేష తల్ప శయనుడయి రంగనాధుడు
ఇటు కోరిన వరములిచ్చు కామాక్షితాయి
అటు వేడిన వెతలు తీర్చు నరసింహస్వామి
మూలాపేట శివాలయం ముక్కంటి అభయహస్తం

బిరా బిరా పెన్నమ్మ దూకుడు
ప్రకృతి కన్య పరచిందిట జలతారు చేలం
పర్యాటకులకిది సుందర బృ౦దావనం

నడిబొడ్డున గాంధీ విగ్రహం
చెప్పకనే చెపుతాయి నెల్లూరీయుల భక్తి
ప్రస్ఫుటమగు రాజకీయ అనురక్తి
సంజె వేళ సాగర సమీర స్పర్శనం
మండే సూర్య తాపానికి శీతల గంధం
చవులూరు రుచులకు కోమల విలాస్
ఇట కంది, మినుము పచ్చడుల సౌరభాలు
గుబాళిస్థాయి దశదిశాంతాలు

నాణ్యమైన నగిషీ నగలకు కేరాఫ్ అడ్రస్
గణింప మేటి సినిమా హాళ్ళకూ ఫేమస్ ప్లేస్
పొట్టి శ్రీ రాములు పోరాట పటిమ కు నెలవు
పుచ్చలపల్లి సామ్యవాద గరిమను కన్న తావు

అన్నింటిని మించి
నెల్లూరు నేరజాణలు అన్నింటా మేటి
లేదు మరో ఊరు నెల్లూరు పట్టణానికి సాటి