పల్లెలు దేశ ప్రగతికి పట్టుగొమ్మలు. పల్లె ప్రజలు సహజమైన మాండలీక పదాలతో పాడుకునే పాటలే జానపదులుగా ఎంతో ప్రాముఖ్యతను సంతరించుకొన్నాయి. జానపదాలు సహజంగానే ఒక ఉత్తేజాన్ని కలిగిస్తాయి. కనుకనే ఏ దేశంలోనైనా, ఏ భాషలోనైనా జానపదాలకు ఎంతో ఆదరణ ఉంటుంది. పాట విన్నంతనే ఎటువంటి వారికైననూ ఒక విధమైన ఉత్తేజాన్ని కలిగించే అతి గొప్ప గుణం ఈ జానపదాలకు సొంతం.

ఇక ప్రస్తుత విషయానికొస్తే, తెలుగు జానపద జావళి, ప్రపంచ చలనచిత్ర రంగంలో ప్రజ్వరిల్లింది. మన తెలుగు చలనచిత్రం “రౌద్రం రణం రుధిరం (RRR)” కొరకు ప్రముఖ గేయ రచయిత చంద్రబోసు గారు వ్రాసి, కీరవాణి గారు స్వరకల్పన చేసిన ‘నాటు నాటు...’ పాటకు యావత్ ప్రపంచం పట్టం కట్టింది. ప్రపంచ వేదికలో ప్రముఖ పురస్కారమైన ‘ఆస్కార్’ ఈ పాటను వరించింది. మన తెలుగు భాషా సంస్కృతులను ప్రపంచానికి రుచిచూపింది. ఈ పాటను రూపకల్పన చేసి ఇద్దరు మేటి నాయకుల సంయుక్త నృత్యకేళిని చూపించిన ప్రతిభాశాలి శ్రీ రాజమౌళి గారు సదా అభినందనీయుడు.

RRR చిత్ర కథ వందేళ్ళ క్రితం నాటి సామాజిక అంశాలతో ముడిపడి ఉంది. కనుక నాటి పల్లె ప్రజల సామాజిక స్థితిగతులను వివరించే నాటుదనం, తెలుగుదనం తదితర ధర్మాలను ఈ పాటలో పొందుపరిచారు. అలాగే నాటి వేష భాషలను ప్రస్ఫుటించే విధంగా చిత్రీకరణ జరిగింది. ఈ గీతం కూడా అచ్చతెలుగు పదాల అల్లికతో ఎంతో హృద్యంగా అలరించింది. ఈ అచ్చ తెలుగు జానపద నృత్య గీతం "నాటు నాటు నాటు" పాటని ఇష్టపడని తెలుగువాడు ఉండడు. ఇంకెందుకు ఆలస్యం మీరు కూడా నేర్చేసుకోండి.