అష్టమ అధ్యాయం (అమ్మవారి విరాడ్రూప మంత్ర, తంత్ర, సగుణ రూప వర్ణన)
శ్లోకాలు: 51/2-60, సహస్రనామాలు: 196-248
సర్వమూ తెలిసిన సర్వజ్ఞమూర్తికి వందనాలు.
విశేషకరుణతో భక్తులను అనుగ్రహించునట్టి కరుణామయికి నమస్కారాలు.
సమానత్వాన్నీ, ఆధిపత్యాన్నీ కూడా వర్జించిన తల్లికి వందనాలు.
శక్తి సర్వస్వ స్వరూపిణికి ప్రణామాలు.
సర్వమంగళ స్వరూపిణియై భక్తులకు సమస్తమైన మంగళాలనూ చేకూర్చునట్టి తల్లికి ప్రణామాలు.
సద్గతులను ప్రసాదించునట్టి మాతకు ప్రణామాలు.
సర్వమునకూ, నిఖిలవిశ్వాలకూ అధీశ్వరియైన సర్వేశ్వరికి వందనాలు.
సర్వమూ నిండి నిబడీకృతమైన సర్వమయీ మాతకు వందనాలు.
అనంతకోటి మంత్రాలకు స్వరూపిణియైన తేజరిల్లు శ్రీవిద్యాస్వరూపిణికి వందనాల
యావద్విశ్వంలోనూ కల అద్భుత ఫలప్రదాయకాలైన సమస్త యంత్రాలు స్వరూపంగా కల తల్లికి ప్రణామాలు.
సమస్తమైన తంత్రాలూ స్వరూపంగా కల తల్లికి నమస్కారాలు.
మనస్సును హృదయంలో - లేదా భ్రూమధ్యభాగంలో నిలిపి ధ్యానించుటకు ‘ఉన్మని’ అని పేరూ అలా ధ్యానించువారికి సిద్ధించునట్టి జ్ఞానామృత స్వరూపిణియైన శ్రీదేవికి వందనాలు.
మహేశ్వరుని ప్రియమైన భార్యయగు మహేశ్వరీ దేవికి వందనాలు.
మహత్తరమైన దేవీ స్వరూపిణికీ వందనాలు.
భక్తులకు సమస్త సంపదలనూ ప్రసాదించునట్టి మహాలక్ష్మీ స్వరూపిణికి ప్రణామాలు.
ప్రాణికోటికి సుఖాలను ప్రసాదించు పరమశివదేవునికి ‘మృడుడ’ని నామమున్నది. అట్టి మృడుని ప్రియురాలైన దేవికి వందనాలు.
మహత్తరమైన రూపంగల తల్లికి వందనాలు.
మహత్తర శక్తి సంపన్నులచే మహాత్ములుచే పూజింపబడునట్టి తల్లికి వందనాలు.
మహాపాతకాలను సైతం నాశనం చేయునట్టి అపారశక్తి స్వరూపిణికి వందనాలు.
ఎంతటి వారినైననూ మహామాయలో పడవేయగలిగిన శక్తి స్వరూపిణికి ప్రణామాలు.
గుణశీల శక్త్యాదులయందు అత్యధికురాలగు మాతకు ప్రణామాలు.
తనను మించిన శక్తి సామర్థ్యాలు కలవారు చతుర్దశ భువనాలలో మరెవరూ లేరు. అట్టి మహాశక్తి స్వరూపిణికి వందనాలు.
మహత్తరమైన రతిస్వరూపిణికి ప్రణామాలు.
మహత్తరమైన భోగాలను అనుభవించునదీ, తన భక్తులైనవారికి సర్వభోగాలను ప్రసాదించగలదీ అయిన సర్వేశ్వరికి ప్రణామాలు.
మహైశ్వర్యంతో తులతూగుతూ తేజరిల్లునట్టి దేవికి నమస్కారాలు.
మహావీరులచే ఆరాధించబడునట్టి మహత్తర వీర్య స్వరూపిణికి వందనాలు.
మహత్తరమైన సైన్యబలాలు శక్తి సైన్యాలు విశేషంగాకల రాజరాజేశ్వరీదేవికి ప్రణామాలు.
మహత్తరమైన బుద్ధియే అంటే సర్వజ్ఞతకు స్వరూపంగాగల దేవికి వందనాలు.
అణిమ, గరిమ, మహిమాది మహత్తర సిద్ధులను ప్రసాదించునట్టి శ్రీదేవికి వందనాలు.
మహాయోగులకు కూడా ఈశ్వరి-దేవత అయిన తల్లికి వందనాలు. మహా యోగీశ్వరుడైన పరమశివుని దేవేరి అయిన మాతకు నమస్కారాలు.