చతుర్ధ అధ్యాయం (అమ్మవారి కుండలినీ యోగం రహస్యం)
శ్లోకాలు: 34/2-37, సహస్రనామాలు: 85-98
వాగ్భవకూట రూపమైన ముఖపంకజంతో భాసిల్లు లలితా పరమేశ్వరికి వందనాలు. (పంచదశీ విద్యతో ప్రధమంగాఉన్న పంచాక్షరీకు వాగ్భవ కూటమని పేరు.)
కంఠమాదిగా మధ్య (నడుము) ప్రదేశం వరకూగల శ్రీ లలిత దివ్యశరీరంలో మధ్యకూటమియైన కామరాజకూటమి ఉంది. అట్టి స్వరూపంగల శ్రీ దేవికి వందనాలు.
తన కటిప్రదేశానికి అథోభాగంలో శక్తికూటాన్ని ధరించియున్న శ్రీ విద్యా స్వరూపిణికి ప్రణామాలు.
సంసార సాగరాన్నుండి తరింప జేయుటకు సాధనమైనది మూలమంత్రము.
అట్టి మూలమంత్రమే ఆత్మగాగల దేవికి ప్రమాణాలు.
మూలమంత్ర యుక్తమైన త్రికూటాలే శరీరంగాగల అంటే కూటత్రయ స్వరూపిణియైన శ్రీలలితా మాతకు ప్రణామాలు.
కుళామృత రసాన్ని ఆస్వాదించడంలో రసికురాలైన శ్రీ మాతకు నమోవాకాలు.
శ్రద్ధాభక్తులతో వినయంగా అర్ధించువారికే శ్రీవిద్యను ఉపదేశించాలి. సత్కల సంకేతాలను పాలించునదీ, పాలింపజేయునదీ అయిన శ్రీవిద్యా స్వరూపిణికి ప్రణామాలు.
పాతివ్రత్యాది గుణశీల పవిత్ర ఇత్యాదులుగల కులాంగన స్వరూపిణికీ ప్రణామాలు.
ఇంద్రియ సమూహమైన కులంలో సుస్థిరమైయుండు మాతకు వందనాలు.
గృహ, ప్రదేశ, దేహాదులన్నింటియందూ పూజింపబడునట్టి కౌళిణీ స్వరూపిణికి ప్రణామాలు.
వైదికులాచరించు సమయాచారమార్గంద్వారా ఆరాధించబడునట్టి కులయోగినీ స్వరూపిణికి ప్రణామాలు.
కుళసంబంధాతీతురాలను పరమేశ్వరికి వందనాలు.
సమయాచార మార్గంలో విహరిస్తూ తేజరిల్లునట్టి దేవికి వందనాలు.
వేద సమ్మతమైన సమయాచార మార్గంలో ఆరాధనలు పొందుటయందు తత్పరురాలైన శ్రీ మాతకు వందనాలు.
* * * చతుర్ధ అధ్యాయం సమాప్తం * * *
పంచమ అధ్యాయం (గ్రంథి భేదనము బంధమోచనము)
శ్లోకాలు: 38-40, సహస్రనామాలు: 99-111
మూలాధారపద్మంలో నాలుగు దళాలుంటాయి. ఆపద్మకర్ణికా మధ్యదేశంలో సర్వదా నిద్రాణస్థితిలో కుండలినీ శక్తి ఉంది. ఆ స్థానంలో ఏకాకినిగా ఉండునట్టి శక్తి స్వరూపిణికి ప్రణామాలు.
మాయచే కప్పబడిన బుద్ధిలో స్వస్వరూపజ్ఞానమును కలిగించుటకై బ్రహ్మగ్రంథిని భేదించినట్టి శ్రీలలితకు ప్రణామాలు.
నాభిలో దశదళ కమలం ఉంది. అందులో రత్నాలంకృతయై భాసిల్లు శ్రీదేవికి కల చక్రానికి మణిపూరకమని పేరు. ఆ చక్రానికి అధోభాగంలో ఉన్న బ్రహ్మగ్రంధిని భేదించి ప్రకటించబడుచున్న శ్రీమాతకు ప్రణామాలు.
మణిపూరక చక్రోపరి భాగానకల విష్ణుగ్రంథిని భేదించుకొని సాక్షాత్కరించునట్టి పరాశక్తిని ప్రణామాలు.
ద్విదళ పద్మంలో ఆజ్ఞాపరుడైన శ్రీ గురువు భాసిల్లుచుండుటచే దానికి ఆజ్ఞాచక్రమని పేరు. అట్టి ఆజ్ఞాచక్రాంతరాళస్థాయై తేజరిల్లు శ్రీ మాతకు నమోవాకాలు.
హృదయస్థానంలో అనాహత చక్రస్థానంలోగల రుద్రగ్రంథిని భేదించు తేజరిల్లు పరమేశ్వరికి వందనాలు.
బ్రహ్మరంధ్రానికి అథోభాగంలో సహస్రదళాలతో తేజరిల్లు పద్మం భాసిల్లుతూంటుంది. ఆసహస్రారకమలో పరిభాగాన ఆరూఢయైన పరమేశ్వరికి అంజలులు.
సహస్రారకర్ణిక నుండి అమృతం వర్షించుచుండును. అంటే పరమేశ్వరి అమృతవర్షిణియై నిజ భక్తులను అనుగ్రహిస్తుంది.
అజ్ఞాన, మాయాదులను రూపుమాపి జ్ఞానప్రకాశంతో మెరపుతీగవంటి కాంతులతో తేజరిల్లు మహేశ్వరికి వందనాలు.
మూలాధార, స్వాధిష్ఠాన మణిపూర, అనాహత, విశుద్ధ, ఆజ్ఞా - నామకాలైన షట్చక్రాలకూ ఉపరిభాగంలో సహస్రార పద్మంలో భాసిల్లునట్టి శ్రీదేవికి వందనాలు.
మహత్తరమైన శక్తి స్వరూపిణికి నమస్కారాలు.
మూలాధార చక్రంలో చుట్టుకొని యుండు సర్వాకృతికల కుండలినీ శక్తికి వందనాలు.
తామర తూడులోని దారమువలె సూక్ష్మమై సన్ననైనది. పీతాభాస్వత్యుణూపమా - అని శ్రుతి కూడా చెప్పుచున్నది-- అనగా పరమాణువువలె పీతవర్ణంతో భాసిల్లుచున్నదని భావము. అట్టి సూక్ష్మ స్వరూపిణికి ప్రణామాలు.
* * * పంచమ అధ్యాయం సమాప్తం * * *