అమృతపానాభిలాషులై యసురసురలు
కవ్వముగఁజేసి మందరక్ష్మాధరంబు
వాసుకిని రజ్జు వొనరించి బలముకొలఁది
క్షీరసాగరమథనంబు సేయు వేళ 1

కమఠావతారుఁడై హరి
సమముగ ధరియించె నగముఁ జక్కఁగ నిలువన్
భ్రమణ మ్మూ పందుకొనన్
క్రమముగఁ దా ముద్భవించెఁగా గరళంబున్ 2

కామధేనువు, శ్వేతాశ్వగజము, లమర
వృక్ష, మప్సరోజనములు, విధుఁడు, పిదప
సకలశుభలక్షణోపేత సాగరసుత
శ్రీమహాలక్ష్మి, యమృతమ్ముఁ జింత దొలఁగ 3

భీకరహాలాహలమును
లోకార్తిహరమ్ముసేయ లోకేశ్వరుఁడే
శ్రీకాళీపాతివ్ర
త్యైకనిదర్శనమనన్ ధరించ గళానన్ 4

కృషియు నమ్మక ముపదేశ(1) మెచట నుండు
నచట కర్మఫలంబు తథ్యంబు మంగ
ళప్రదంబయి లోకల్యాణకారి
యగుట కిది దివ్యమౌ యుదాహరణ గాదె ? 5
(1) సరస్వతీప్రతీక

సిరి పుట్టిన మాస మ్మిది
సిరి మెట్టిన మాస మిదియె, చేయుదు రెలమిన్
సిరి జన్మదినము నీ నెల,
స్థిరముగ ఘల్ ఘల్లటంచు సిరి దిరుగంగన్ 6