భారతీయ ఆధ్యాత్మిక భగవదన్వేషణా మార్గాలు మానవ సమాజానికి అయాచితంగా లభించిన అపురూప రత్నాలు.

రవీంద్ర సాహిత్యం, ప్రత్యేకంగా గీతాంజలి, భారతదేశ సాహిత్యానికి ప్రపంచ వాఙ్మయంలో ప్రత్యేక స్థానాన్ని‌ కల్పించడంలో విశేష పాత్ర వహించింది.

రవీంద్రుని గీతాల్లో అంతర్లీనంగా అద్వైత, విశిష్టాద్వైత సిద్ధాంతాలు, మధుర, దాస్య, సఖ్య భక్తి మార్గాలు విశేషంగా దర్శనమిస్తాయి. అంతే కాకుండా, "ఈశావాస్య మిదం సర్వం యత్కించ జగత్" అన్న ఉపనిషద్వాక్యానికి గీతాల రూపాన్ని చేకూర్చాడా అన్నట్టుగా ప్రకృతి అణువణువులోనూ పరమాత్మ స్వరూపాన్ని దర్శించి పాఠకులకు ప్రదర్శిస్తుంది విశ్వకవి గీతాంజలి.

గీతాంజలి చిత్రకారులకు అందమైన ఉద్యానవనం, కవులకు అక్షర స్వర్గం, తాత్వికులకు పరమాత్మ దర్శనం.

నిజానికి ఈ గీతాలు రవీంద్ర కవి తనకొరకు వ్రాసుకొన్నవే కానీ ఆ గీతాల విశ్వజనీనత చేత పాఠకునికి తన హృదయంలోని‌ భావాలు ఎదుట సాక్షాత్కరిస్తాయి.

గీతాంజలిని విశ్వకవి స్వయంగా బెంగాలీ నుంచి ఆంగ్లంలోనికి అనువదించారు. అటుపిమ్మట ఆంగ్లం నుంచి ఎందరో మహానుభావులు తెలుగులో పద్య రూపంలో, వచన కవితల రూపంలో మనకు అందించారు. వారిలో ముఖ్యంగా ప్రఖ్యాత నటులు కీ.శే. కొంగర జగ్గయ్య గారు, కీ.శే. చిలుకమర్రి రామానుజాచార్యులు, శంకరంబాడి సుందరాచారి గారు, గుడిపాటి వెంకటా చలం గార్లు (చలం).

అంతటి మహత్తర కృతిని మళ్ళీ అనువాదం చేయడం సాహసమైనా ఆ ఆలోచన కేవలం భగవద్సంకల్పం అన్న భావన నన్ను ముందుకు నడిపించింది.

సీస పద్యం తెలుగు భాషకు ప్రత్యేకం అత్యంత సుందరమైనదీ ఆలాపనకు అనువైనదీ కావడం చేత ఆ ఛందస్సును ఎన్నుకోవడం జరిగింది.

ఆచార్య రామచంద్రుడు గారి రచనలు చిలుకమర్రి వారి గీతాంజలి ఆవిష్కరణ, పూజ్యశ్రీ పెండ్యాల సీతారామయ్య గారి కుసుమ హరనాథ భక్తి గీతాలు, పోతన భాగవతమూ నన్ను ఎంతో ప్రభావితం చేసిన కృతులు, ఈ మహా కవుల భావనా సౌకుమార్యము రచనా ప్రౌఢిమ వాటిని చదివినప్పుడల్లా నాకు అత్యంత ఉత్సాహాన్ని ఆనందాన్ని కలుగజేస్తాయి. అందువల్ల ఆ మహా కవుల పదాలు భావనలు ఈ పద్యాల్లో అగుపి‌ంచడం వారి రచనల పట్ల నాకున్న ఆకర్షణ, అభిమానం మాత్రమే.

ఎందరో మహానుభావులు గురుదేవుల నుండి బెంగాలీ గీతాంజలిని దత్తత తీసుకొని తమ పుత్రికగా ప్రేమనందించి తమదైన భాషలో అనేక దశాబ్దాలుగా  పెంచుకున్నారు. ఆ మాహాకవులు పూజించిన అక్షరసుమాల గంధాన్ని ఆఘ్రాణించి ఆనందించి, విశ్వకవి తాను స్వయంగా చేసిన ఆంగ్లానువాదాన్ని అలతిపదాలతో వ్రాసిన ఈ పద్యాల్లో దోషాలు ఏవైనా దొర్లి ఉంటే సహృదయిలైన తెలుగు పాఠకులు పెద్ద మనసుతో స్వీకరించి ఆ గీతసుమగంధాన్ని ఆస్వాదించగలరని భావిస్తూ...విశ్వకవికి నా అక్షర సుమాంజలులు సమర్పిస్తున్నాను :