ప్రతి మనిషి పుట్టుకకు ఒక నిర్దిష్టమైన కారణముంటుంది. ఆ కార్యాన్ని నిర్విఘ్నంగా పూర్తిచేసినప్పుడు మనిషి జన్మకు సార్థకత చేకూరుతుందంటారు. కొందరి జీవితాలలో అదృష్టం కూడా తోడై వారు చేసిన మహాత్కార్యాలకు మంచి గుర్తుంపు లభించి సమాజంలో వారికంటూ ఒక ఉనికి ఏర్పడుతుంది. మరికొందరు ఎటువంటి గుర్తింపుల గురించి గానీ, వచ్చే అవకాశాల అదృష్టాన్ని పరీక్షించుకోవడం గానీ చేయక, ఆ సమయాన్ని కూడా విలువకట్టలేని అమూల్యమైన విషయాలను భావితరాలకు విశ్లేషణ రూపంలో అందించాలని ‘నివురుగప్పిన నిప్పు’ వలె తమ వృత్తి, ప్రవృత్తి నిష్ఫలాపేక్షతో చేసే అక్షరోపాసన అయి, తమ జీవితాలను నిత్యం సమాజ శ్రేయాస్సు కు సహకరించే విషయాల మీద కేంద్రీకరిస్తారు. ఆ కోవలోకే చేరిన  మితభాషి, మననశీలి, అనాసక్త తత్వాన్వేషి, ఋషితుల్యులు శ్రీ సూరపరాజు రాధాకృష్ణమూర్తి నేటి మన ఆదర్శమూర్తి.

ముందుగా, ఈ ఆదర్శమూర్తి గురించిన సమాచారాన్ని నాకు అందజేసిన శ్రీమతి సూరపరాజు రమాదేవి గారికి, సూరపరాజు పద్మజ గారికి మరియు శ్రీ వేములపాటి శ్రీనివాసమూర్తి గారికి నా హృదయపూర్వక ధన్యవాదాలు. వారి ప్రమేయం లేకుంటే మూర్తి గారి భావుకత, తాత్వికత మేలు కలయికల పాండిత్య పటిమ గురించి మన సిరిమల్లె పాఠకులకు తెలిపే అదృష్టం ఉండేదికాదు.

రాధాకృష్ణ మూర్తి గారి రచనల సంఖ్య తక్కువే ఉండవచ్చు కానీ ఆ రచనల విషయ సాంద్రత విస్తారమై, వివిధ అధ్యయనాల సమన్వయ దృక్పథాలతో నిండి ఉన్నవి. అందుకు కారణం వారి బహుభాషా పాండిత్య పటిమ మరియు సైకాలజీ మొదలు లిటరేచర్ వరకు వివిధ రంగాలలో వారు ఎంతో ఆసక్తితో చేసిన ఎల్లలెరుగని పఠనము.

వీరి చదువు ఒక తపస్సు వంటిది, అందుకు ఎటువంటి విద్యాలయాలు, ఉన్నత విద్యార్హతలు అవసరం లేదు. కనుకనే తోటివారు డాక్టరేట్ లు సాధించి ఉన్నత పదవులు అందుకునేటప్పుడు వీరు సాధారణ ప్రభుత్వ డిగ్రీకళాశాల ఉపన్యాసకుడిగా వృత్తిలో స్థిరపడి, మిగతా సమయమంతా నిరంతర అధ్యయనానికి వెచ్చించారు. ఆంగ్లము, సంస్కృతమూ, ఫ్రెంచ్ భాషా సాహిత్యాలపైన ఆసక్తితో ఆ సాహిత్యాలను చదువుతూనే ఆ భాషలను ఆమూలం అభ్యసించారు. సంస్కృతంలో పాణిని వ్యాకరణసూత్రాలు, పతంజలి మహాభాష్యం ఉపనిషత్తులు,  ఆదిశంకరుల భాష్యాలూ వీరికి కరతలామలకం.

నేటి ప్రకాశం జిల్లా, కందుకూరు మండలం లోని ఓగూరు గ్రామంలో ఆగష్టు 15,1935 లో రాధాకృష్ణ మూర్తి గారు జన్మించారు. బాల్యం నుండే పుస్తక పఠనానికి ఎక్కువ ఆసక్తి కనపరిచేవారు. అదే ఆయనను మద్రాసులో కాలేజీ చదువుతున్న సమయంలో కాలేజీ లో కన్నా ఎక్కువ సమయం హిగిన్ బాదమ్స్ పుస్తకాలషాప్ లోనే  గడిపేటట్లు చేసింది. ఇంగ్లీష్ సాహిత్యంలో, ప్రాచ్య, పాశ్చాత్య వేదాంతాలలో చదవవలసిన గ్రంథాలన్నీ అప్పుడే చదివేవారు. తెలుగులో విశ్వనాధ దగ్గరనుంచి అప్పటి వరకూ ప్రసిద్ధులైన రచయితల పుస్తకాలన్నీ చదివారు. మొదటి పఠనంతోటే పుస్తకం లో గ్రహించవలసింది గ్రహించే మేధ ఆయన స్వంతం.

మద్రాస్ క్రిస్టియన్ కాలేజీలో బి ఎ ఇంగ్లిష్ లిటరేచర్, ఆ తరువాత ఉద్యోగం చేస్తూ బెనారస్ యూనివర్సిటీలో ఎమ్. ఏ. లిటరేచర్ లో పట్టభద్రుడయ్యారు. గురువెరగని గురుత్వం మూర్తిగారిది. గ్రంథాలే ఆయన గురువులు.

యాభై అయిదవ వయసులో రాధాకృష్ణ మూర్తి గారికి కలిగిన ఒక విషాదం ఆయనకు తనను తాను మరపించుకోవలసిన అగత్యం ఏర్పరచింది. అప్పుడు మొదలు పెట్టి తనకై వారు చేసుకున్న మొదటి ప్రముఖ రచన, భగవద్గీత పై ఆదిశంకరుల సంస్కృతభాష్యాన్ని తెలుగులోకి అనువదించటం. అంతకుపూర్వం వారు ఎన్నో ప్రసిద్ధ గీతావ్యాఖ్యలు చదివి ఉండటం వల్ల శంకరభాష్యంలోని నిరుపమానమైన ప్రత్యేక ఉపదేశం వారికి అనుభవసారంగా సిద్ధించింది. గీతలో ముఖ్యంగా చర్చచేయబడే అంశాలైన కర్మ, యుద్ధము, సన్న్యాసము ల నిజార్థము వీరు దర్శించి ఆవిష్కరించిన విధము, ఒక కొత్త దృష్టి తెచ్చిపెట్టింది ఆ గ్రంథానికి, అందుకే రామకృష్ణామఠం, హైదరాబాద్ వారు వీరి ‘భగవద్గీత శంకరభాష్య అనువాదం’ ప్రచురించారు. నిజానికి అంతకుమునుపే మూర్తి గారి కుమార్తె గారి 'జనని' ద్వారా ప్రచురించిన ఈ భగవద్గీత శంకరభాష్యం ప్రముఖ ఆంగ్ల పత్రిక 'The Hindu' మరియు కొన్ని తెలుగు పత్రికల చేత మిక్కిలి ప్రశంసా స్పందనలు అందుకున్నది.

ఆ తరువాత కొందరి పండిత పాఠకాభిమానుల కోరిక మేరకు ఉపనిషద్ వ్యాఖ్యలు వ్రాయడం మొదలుపెట్టారు.

'ఈశోపనిషత్తు', 'కేన', 'కఠ' జనని ద్వారా రెండు ముద్రణలు పొందింది. 'మాండూక్య' ముద్రణలో ఉంది. బహుభాషా కోవిదులైన రాధాకృష్ణ మూర్తి గారు ఆంగ్లంలో ‘Upanishads Insights into Infinity', 'Krishna calling, a free rendering on Gita' రచించారు. అంతేకాదు దాని తెలుగు అనువాదం 'కృష్ణుని పిలుపు' జ్ఞానదేవ్ 'అమృతానుభవం' తెలుగుసేత ఇంకా కొన్ని అనన్యసామాన్య విజ్ఞాన దీపికలుగా రచింపబడ్డాయి.

'షేక్స్పియర్ - సాహిత్యావలోకనము' అని మాతృ భాష లో ప్రపంచ రచయితలను తెలుసుకోవాలనుకునే వారికి ఆంగ్ల భాషను ఆశ్రయించే అవసరం లేకుండా చేసి ఆ పుస్తకం నాటకకర్తగా షేక్స్పియర్ ని ఎవ్వరూ ఊహించని ఎత్తుకు చేర్చిన ఘనత మన మూర్తి గారిది.

వీరి ఈరచనల ప్రధమ ఉద్దేశ్యం, ప్రయోజనం ఎక్కడ ఉన్నదంటే అవి రాసిన పద్ధతిలో నిగూఢమై ఉంది.

వీరి రచనలన్నీ ముందే చెప్పినట్లు వారి ఎనిమిది పదుల జీవితంలో (ఇప్పటికీ) చేసిన విస్తార, వివిధ అధ్యయనాల సమన్వయ దృక్పథాలతో నిండి ఉన్నవి.