ఎంత అందంగా ఉంది
రవ్వలతో, రంగురంగుల రత్నాలతో
నైపుణ్య యుక్తియుక్తంగా చెక్కబడిన
నీ నక్షత్ర కర కంకణం!

కాని

రౌద్రారుణ సాయం సంధ్యలో తళుకొత్తే
శంపాలతల వజ్రధారల వంటి
గరుడ గరుత్తుల వంపులు సొంపారిన
నీ కరవాలమే కమనీయం సుమా!

అది -

మరణం వేసిన చివరి వేటుకు
కంపిస్తున్న వైవశ్య విషాదంలా
ఝళిపిస్తుంటుంది !
దగ్ధమౌతున్న శుద్ధాత్మ కీలలా
భయానక కాంతిలా జ్వలిస్తుంటుంది!

అందమైనదే

నీ రత్నఖచిత నక్షత్ర కర కంకణం

కాని,

భయదనిర్భర ఊహాతీత రత్న రమణీయంగా,
అనితర అద్భుత అరుణ ద్యుతిలా ప్రజ్వలిస్తున్నది
ఓ పర్జన్య ప్రభూ ! నీ ఖడ్గం !

- (నా అనువాద సంపుటి "రవీంద్ర గీత: గీతాంజలి" నుండి).