రెండు రెళ్ళు
నాలు గనుకోవటం నీతి,
ఇరవై రెండని
అనుకోవటం అవినీతి.

లెక్కను
సరిగా చేస్తే నీతి,
లెక్కను లెక్క చెయ్యకపోతే
అవినీతి.

భయపెడుతున్నా నని
నిప్పు కణికె అహం,
కావాలని అంటుకొని
కాల్చుకుంటారా జనం.

మంత్రి నిమ్మకాయ,
పులుపైనా ఇష్టం,
గింజ చేదు గదా
కొడుకును భరించటం కష్టం.

అమెరికా కొడు కొచ్చి
కొనిపెట్టాడు కారు,
నెల వాయిదాలు కట్టలేక
తండ్రి బేజారు.

కొడుకు మాట్లాడితే
హద్దులు గుర్తు చేస్తూ,
మనవడు పోట్లాడినా
ముద్దులు కురిపిస్తూ.

పడిపోతావు, జాగ్రత్త
అంటారు మిత్రులు,
ఎండ – పడితేనే గదా
లోకం లేచేది.

ఉదయమే కలం తీసుకున్నా
కానీ మూసేసా,
ఎండను మించిన
కవిత్వం రాయగలనా!

ఎండలో జాగ్రత్త
పిల్లలతో తల్లి,
ఎండకు జాగ్రత్త
చేప్పేవా రున్నారా!

దేశంలో
ప్రశాంతి “విద్యుత్తు” పోయింది,
కొందరి కిబ్బంది లేదు
“ఇన్వర్ట” రుంది.