సకలజన ప్రియత్వము ని | జంబుగ గల్గిన పుణ్యశాలి కొ
క్కొక యెడ నాపదైనఁదడ | వుండదు వేగమె పాసిపోవుగా,
యకలుషమూర్తియైన యమృ | తాంశుడు రాహువు తన్నుమ్రింగినన్
డకటకమాని యుండడె? దృ | ఢస్థితి నెప్పటియట్ల భాస్కరా!

తాత్పర్యము: భాస్కరా! సకల జనుల యొక్క ఆదరమునకు పాత్రుడైన పుణ్యాత్మునికి ఒకప్పుడు కీడు కలిగినను, ఆ కీడు చాలా కాలము ఉండకుండా త్వరలోనే తొలగిపోగలదు. అది ఎట్లనగా నిర్మలమైన కాంతి కలిగిన చంద్రుడు రాహు గ్రహము తనను మ్రింగినను, ఆందోళన పడక, తొందరపాటును వదలి తట్టుకొని ఎప్పటి మాదిరిగానే ఉండును.