శ్రీ నీలం సంజీవరెడ్డి గారి యాభైయవ జన్మదినం సందర్భంగా మే 19,1963న శ్రీ నార్ల వెంకటేశ్వరరావు గారు ఆంధ్రజ్యోతిలోని తన సంపాదకీయంలో సంజీవరెడ్డి గారి గుణగణాలలో ప్రత్యేకంగా ఎన్నదగినట్టిది నిర్భీతి అని ప్రశంసిస్తూ, ముఖ్యమంత్రి పదవిలో ఉన్నా లేకపోయినా, ఆయన ఆంధ్రప్రదేదేశం లోనే కాదు, దక్షిణాపథంలోనే కాదు, యావద్భారతంలోనే ముఖ్యనాయకులు అని కొనియాడుతూ - తనదైన శైలిలో ప్రజాస్వామ్యంలోని రాజకీయ నాయకులకు కరదీపికలు అనదగ్గ మాటలు రాశారు.

“కత్తి మీద సాము వంటిది ప్రజాస్వామ్యంలో నాయకత్వం. ప్రజలు వెంట వస్తున్నారో, లేదో చూసుకొనకుండా తాను ముందుకు సాగిపోరాదు. అంతమాత్రాన నడకలో తాను ప్రజలకు వెనుకబడరాదు కూడా. వారితో అడుగు కలుపుతూ, ఎప్పటికప్పుడు ఒకటి, రెండు అడుగులు మాత్రం ముందుకు ఉండాలి.

ప్రజల మన్నన కోసం పార్టీని బలహీన పడనివ్వరాదు, పార్టీకోసం ప్రజల యోగక్షేమాలకు విరుద్ధంగా కూడా వెళ్లరాదు.

పార్టీలో సర్వసాధారణంగా ఉండే వర్గాలను నిర్లక్ష్యం చేయరాదు, వాటికి అత్యధిక ప్రాధాన్యం కూడా ఇవ్వరాదు.

ప్రభుత్వోద్యోగులను, వారి సలహాలను తృణీకరించరాదు. ఇదే సమయంలో వారినే విస్సన్నలుగాను, వారి వాక్కునే వేదంగా పరిగణించరాదు కూడా.

ఇతర విధాల కూడా ప్రజాస్వామ్యంలో నాయకత్వం అసిధారావ్రతమే. ఆ నాయకత్వ నిర్వహణలో ప్రజాభీష్టానికి వ్యతిరేకంగా ఒక్కొక్కప్పుడు కొన్ని నిర్ణయాలను చేయవలసి వస్తుంది. ఆప్తులైన వారికి కూడా అప్రియ సత్యాలను చెప్పవలసి వస్తుంది. అనుయాయులైన వారికే ఆశాభంగాలను కలిగించవలసి వస్తుంది. ప్రతికక్షులైన వారిని కూడగట్టుకుని పోవలసి వస్తుంది.

ఇంత క్లిష్టమైన ఈ నాయకత్వ బాధ్యతల నిర్వహణలో శీఘ్ర నిర్ణయ శక్తి ముఖ్యావసరం. అయితే, ఎంత శీఘ్ర నిర్ణయమైనా అనాలోచిత నిర్ణయం కారాదు, అనుచిత నిర్ణయం సయితం కారాదు. ఒకసారి నిర్ణయానికి వచ్చిన తర్వాత దాన్ని అమలు పరచడంలో సంకోచాలు, సందేహాలు ఎంతమాత్రం తగవు. నిర్ణయం చేసి, అమలు జరుపుతున్న ఘట్టంలో అది సముచిత నిర్ణయంకాదని తనకు తోస్తే, ప్రతిష్టకై పెనుగులాడక, దాన్ని వెంటనే ఉపసంహరించుకోవాలి.”

పుట్టుకతోనే ఈ శక్తి సామర్ధ్యాలు, ఈ ప్రజ్ఞాప్రాభవాలు చాలావరకు అబ్బినందునే శ్రీ సంజీవరెడ్డి గారు చిన్నతనంలోనే నాయకత్వానికి రాగలిగారని, దేశ నాయకులలో ఒకరుగా చెల్లుతున్నారని ప్రశంసించారు. వర్ధమాన రాజకీయ నాయకులు ముందటి తరం ప్రజానాయకుల జీవితాలను, వారి మంచి చెడ్డలను చక్కగా అధ్యయనం చేసి, తమ రాజకీయ జీవితాన్ని మలచుకోవాలి. కానీ, ఇటువంటి దృక్పథం భారత రాజకీయాలలో ఉండేటువంటి అవకాశం నేడు లేదు. భవిష్యత్తులో అసలే లేదు.

ఎందుకంటే - భవిష్యత్తులో భారతదేశానికి రాబోయే సంక్షోభం ఆర్ధిక పరమైనదో, సామాజిక పరమైనదో, పర్యావరణ పరమైనదో కాదు - సరియైన రాజకీయ నాయకత్వం లేకపోవడం అన్నది. మన దేశంలో నేడు మధ్యతరగతి యువతకు రాజకీయాలలోకి వచ్చి పనిచేసేందుకు ఎటువంటి అవకాశాలు లేవు. రాజకీయ వారసత్వంతో కూడిన ధనబలం ఉన్నవారికీ, వ్యాపారవేత్తలకు, గూండాయిజం చేయగలవారికి మాత్రమే రాజకీయాలలో పనిచేసే అవకాశం ఉన్నది. ఇలాంటి పరిస్థితులలో నిస్వార్ధ నాయకత్వం దేశ ప్రజలకు లభ్యమవ్వడం మృగ్యం. దేశ ప్రజలకు సైతం అవినీతిపరులు, రౌడీలు,చట్టాన్ని, రాజ్యాంగాన్ని లెక్కచేయని వారు, నిరంకుశ స్వభావం కలవారు, మాటలతో మభ్యపెట్టే వారు మటుకే కంటికి ఇంపుగా, తాము వేసే వోటు అందుకునేందుకు అర్హులుగా కనిపిస్తున్నారు.