సాహితీ సిరికోన

Q: శ్రీ అనుమాండ్ల భూమయ్య

అక్షరములతో నే నిత్య మాడుకొనుచు నుండ, నాహృదయమ్ములో నున్న అక్ష రమ్ము నను పిల్చె లోనికి రమ్మటంచు; ఆట లిక చాలు ర మ్మన్న అమ్మ వోలె.

“మన సాహిత్య అభిరుచిని పెంచుకునేలా, రోజూ కవితలో, ఇతర సృజనాత్మక రచనలో, వివేచనలో స్పందనలో పంచుకునేలా, తెలుగుభాషా సాహిత్యాలను ప్రేమించే అన్ని ప్రాంతాల వారూ పాలుపంచుకొనేలా” — కాలిఫోర్నియా నుండి అక్టోబర్ 2, 2018, గాంధీజయంతి నాడు ప్రారంభమైన తొట్టతొలి వాట్సాప్ సాహితీ దినసంచిక "సాహితీ సిరికోన" (Silicon=సిరికోన; రలయోరభేదః).

ప్రారంభించిన వారు ఆచార్య గంగిశెట్టి లక్ష్మీనారాయణ గారు, పూర్వ ఉపకులపతి, ద్రావిడ విశ్వవిద్యాలయం, కుప్పం, ఆం. ప్ర., ప్రస్తుతం ఫ్రీమాంట్ నగర వాసి. అదే ప్రాంతంలోని సాహిత్య ప్రియులు శ్రీ వేణు ఆసూరి, ఉభయభాషావధాని, శ్రీ పాలడుగు శ్రీ చరణ్ గార్లు కార్యనిర్వాహకులు.

ప్రారంభమైన వేళావిశేషమేమిటో కానీ, ఎందరో ప్రసిద్ధ కవులు, రచయితలు, విమర్శకులు అద్భుతమైన రచనలతో సంచికను పరిపుష్టం చేస్తున్నారు... వారంరోజుల్లోనే ఒక మంచి సాహిత్య పత్రికగా రూపొందింది..

అందులోంచి ప్రతినెలా ఏర్చి, కూర్చిన రచనలను ‘సిరిమల్లె’ పాఠకులకు అందించాలని సంకల్పించాం...మొదటగా అక్టోబర్ నెలలోని ఆణిముత్యాలు...ఆయా రచయితల అనుమతితో....మీకోసం .....

చదవడానికి, వారి పేర్ల మీద క్లిక్ చేయండి.

పద్యాలు

శ్రీ అనుమాండ్ల భూమయ్య

శ్రీ పాలడుగు శ్రీచరణ్

శ్రీ ఏల్చూరి మురళీధరరావు

కవితలు

శ్రీ నాగరాజు రామస్వామి

శ్రీ వేణు ఆసూరి

ఆచార్య గంగిశెట్టి ల.నా.

శ్రీ వెంకట నక్త రాజు

చిరకాలపుచిరుకోరిక!

కమ్మనైన కవనమొకటి,
తీయనైన కవిత యొకటి,
కంచికి పోని కథనొక్కటి,
వినాలని చిరకాల కోరిక!
హృద్యమైన పద్యమొకటి,
అనవద్యమైన గద్యమొకటి,
అందమైన కందమొకటి,
చదవాలని చిరకాల వాంఛ!
మత్తుగొలిపె మత్తకోకిలొకటి,
రసములూరు సీసమొకటి,
తేనెలూరు తేటగీతినొకటి,
వీనులార విందామని చిన్ని ఆశ!
అచ్చ తెనుగు పాటలను,
అచ్చెరువుల మాటలను,
స్వచ్ఛమైన ఉచ్చారణలు,
ఒక్కసారి విందామని ఆకాంక్ష !
వెన్న ముద్దలు తిన్నట్టు,
జున్నుపాలు తాగినట్టు,
పున్నమి వెన్నెల గాచినట్టు,
కన్నవారు వెన్ను నిమిరినట్టు,
పోతన పద్యాల జలపాతములో,
నన్నయ, పెద్దన పద జలధి లోతులో,
తిక్కన, వేమన పద కైతల స్రోతసుల,
జలకాలాడాలని చిర కోరిక - చిరు కోరిక!
కృష్ణ శాస్త్రి పాటల పసిడి మేడలను,
విశ్వనాథ కల్పతరువు లేనీడలను,
శ్రీరంగం ప్రస్థానపు మెరుపుదాడులను,
సినారె విశ్వంభర దివ్యవీథి జాడలను,
కనులారా చూడాలని ఆరాటం!
తెలుగు పలుకులు -
తెలుగు జిలుగులు,
తెలుగు వెలుగులు -
తెలుగు తళుకులు,
తెలుగు మెరుపులు,
తెలుగు తలపులు,
తెలుగు సౌరభం,
తెలుగు వైభవం!
మధురానుభవం!
దేశ భాషలందు తెలుగు లెస్స -
కవులందు తెలుగు కవులు హైలెస్స!