భ్రష్టున కర్థవంతులగు | బాంధువు లెందఱు గల్గినన్ నిజా
దృష్టము లేదు గావున ద | రిద్రతఁ బాపఁగలేరు ; సత్కృపా
దృష్టిని నిల్పి లోకుల క | తి సిరి సంపదలిచ్చు లక్ష్మి యా
జ్యేష్ఠ కదేటికిం గలుగఁ | జేయదు తోడనె పుట్టి భాస్కరా!

తాత్పర్యము: భాస్కరా! జ్యేష్ఠాదేవికి చెల్లెలై పుట్టిన లక్ష్మీ దేవి ప్రజలందరినీ సత్కృపాదృష్టితో చూచి శాశ్వతమైన భాగ్యముల నిచ్చును. కాని అక్కయగు జ్యేష్ఠాదేవికి సహాయము చేయలేక పోయెను గదా! అట్లే అదృష్టము లేని వానికి భాగ్యవంతులగు చుట్టములు ఎందరు ఉన్ననూ, వానికి భాగ్యరేఖ లేనందున వారెవరు అతడి బీదతనమును పోగొట్టలేరు.