“ఛ ఛ ఈ ఇంట్లో ఎవరికీ చెప్పలేము! 'బోడెద్దుకు పోట్లు మప్పొద్దు' అంటే విన్నారు కాదు. ఇప్పుడు అనుకుని ఏం లాభం” అని గుడి నుంచి వస్తూనే రుస రుస లాడింది యమున.

“ఏమయ్యిందమ్మా అలా కోప్పడుతున్నావు?” అని వంటింట్లోంచి వస్తూ కోడలిని అడిగింది రాగిణి.

“ఏం చెప్పమంటారు. ఈ రోజు నా పుట్టినరోజు నేను, మీకొడుకు గుడికి వెళ్ళి అభిషేకం చేయించుకుని వద్దామని అనుకున్నాము. ఈలోగా మామగారు 'ఊరుకున్నదానికి ఉల్లి మిరియం పెట్టినట్లు' మనవరాలికి చెప్పారు. తను కూడా మాతో వస్తానని పేచీ పెట్టింది.” అని నిష్టూరమాడింది కోడలు.

“పోనీలే…దానిలో తప్పేముంది. మనపిల్లల్ని మనం తీసుకువెళ్లకపోతే పక్కింటి వాళ్ళో ఎదురింటి వాళ్ళో తీసుకువెళ్తారా. పిల్లలన్నాక తల్లి, తండ్రి తో బయటకు వెళ్ళడానికి సరదా పడతారు ఆ మాత్రం దానికే బోడెద్దు అని నానా మాటలు అనాలా?” అని గట్టిగా నిలదీసింది అత్తగారు.

“అయ్యో అత్తయ్యా! 'బోడెద్దుకు పోట్లు మప్పడం' అనేది ఒక సామెత. దూడ పెయ్య తల దగ్గర చేతులు పెట్టి సరదాగా ఊపితే అది కూడా సరదాగా ఊపుతుంది. పెద్దది అయ్యాక దానికి కొమ్ములు వస్తాయి. తల ఊపడం లేదా పొడవడం అలవాటుగా మారి మనం దగ్గరికి వెళ్ళేసరికి పొడుస్తుంది. ఎవరికైనా లేని అలవాటును చేసిన సందర్భంలో ఈ సామెత వాడుతున్నాం” అని వివరించింది కోడలు.

“నీ కూతురికి ఎవరు ఏమిటి నేర్పారు?” అని నిలదీసింది అత్తగారు.

“దారంట పోతున్న ఆవులకు అరటిపండు పెట్టమని మనవరాలికి చెప్పేవారు మామగారు. మీ మనరాలికి అది అలవాటుగా మారింది.” అంది కోడలు.

“అయితే ఏమయ్యింది. మూగ జీవాలకు పెట్టడం మంచిదే కదా!”

“గుడికి వెళ్ళి అభిషేకం చేయించుకున్నాము. పంతులుగారు ప్రసాదంగా అరటిపండు, కొబ్బరిచిప్ప ఇచ్చారు. 'నీవు నేర్పిన విద్యే నీరజాక్షి' అన్నట్లు మీ మనవరాలు అరటిపండు అవుకు తినిపించింది. కొబ్బరిచిప్ప గుడి దగ్గర ఉన్న బిచ్చగత్తెకి ఇచ్చింది.” అని చెప్పింది.

“ఆకలితో ఉన్న ఆమెకు ఇవ్వడం పుణ్యమే కదా!” అంది అత్తగారు.

“పుణ్యమా పాడా! ఆ కొబ్బరిచిప్ప తో పచ్చడి చేద్దామని అనుకున్నాను. 'తానొకటి తలిస్తే దైవమొకటి తలచినట్లు’ ఆ కొబ్బరిచిప్ప బిచ్చగత్తెకి ఇచ్చింది” అని వాపోయింది కోడలు.

“అయ్యో! రామ! ఏళ్లు ఎగసన్నం బుద్ధులు దిగసన్నం అంటే ఇదేనేమో. వయసుపెరిగింది కానీ నీ బుద్ధి మారలేదు” అంది కోడలివైపు చూస్తూ అత్తగారు.

పిల్లలకు లేదా పెద్దలకు లేని ఆలోచనలు కల్పించడం లేదా అలవాట్లు నేర్పించడం వల్ల ఇబ్బంది కలిగిన సందర్భంలోనూ, బాస్ లేదా పై అధికారి మెప్పు కోసం, గొప్పకోసం లొసుగులు, కిటుకులు తెలియచేసి బాస్ వల్ల ఇబ్బంది పడిన సందర్భంలోను వాడే సామెత ఇది.