ఇంగ్లండ్లో ఇక్కట్లు….
ఇంగ్లండు వనితల ఇక్కట్లు లిసనింగు
ప్రతిరోజు చాకిరీ చేయుచూ మోనింగు
ఇంటిలో చోర్సులు సదా అనెండింగు
మొగునితో ఫైటింగు రోజంత నో టాకింగు
పగలంత వర్కింగ్ సాయంత్రం కుకింగు
కార్పెట్టు క్లీనింగు ఇల్లంత డస్టింగు
పలు ఆధునిక గేడ్జెట్స్ ఇంటిలో పెరేడింగు
వాటిని ఆన్ ఎండ్ ఆఫ్ చేయుటకు టైం టేకింగు
వింటర్లో చీరల్లో గడగడా షివరింగు
ఫేషనని పార్టీలో షీఫాన్లో సఫరింగు
మరునాడు డాక్టరు క్లినికికు విజిటింగు
పార్టీలలో ఛనా పనీరు ఈటింగు
మగవారు లేచి వెర్రిగా డాన్సింగు
ప్రతిరోజు కొకసారి చిటపట రెయినింగు
గొడుగులేకుంటే రోడ్లెంబడి రన్నింగు
బయిటికెళ్ళాలంటె కోటు వేరింగ్
కేర్ లేకుంటే స్నోలో ఫాలింగు
లేటు వయసులో బొమికలు ఫ్రేక్చరింగు
హెల్పు లేకున్నా ఫోన్లు రింగింగు
సమయం చిక్కగనే సిరికోనకు రైటింగు.
మానవత్వం మేల్కొంది !!!
గుండెల్లో సెగ గుస గుసమంది
ప్రతీకార జ్వాల బుస బుసమంది
గునపాలు గుచ్చినట్లు
గుండెల్ని బాదినట్లు
గాయాన్ని కెలికినట్లు
అహం నిద్ర లేచింది
కాళ్ళని కదం తొక్కమంది
కత్తిని చేపట్టమంది
కళ్ళని నెత్తురు చూడమంది
హఠాత్తుగా........ దారిలో….
సహనం అడ్డుగ నిలిచింది.
కారుణ్యం కళ్ళు తెరిచింది
ప్రేమ చేయి చాచింది
కర విన్యాసం ఆగింది
కాళ్ళకి బంధం వేసింది
కత్తి చేజారింది
కంట నీరు కారింది
ప్రతీకార జ్వాల ఆరింది
గుండెల సెగ గొణిగింది
మానవత్వం మేల్కొంది!!!
*****
ముందుమాట
నాకు చిన్నప్పటినుంచి వచనకవిత్వంలో ఓ రకమైన కుతూహలం ఉండేది. 14-15 ఏళ్ళ వయస్సులోనే కీర్తి శేషులు డాక్టర్ సి. నారాయణరెడ్డి గారి కవితలు, వారు ఆ కవితలని పఠించే తీరు నన్ను చాలా ఆకర్షించేది. నేను ఉస్మానియా విశ్వవిద్యాలయంలో రసాయనిక శాస్త్రం అభ్యసిస్తున్నప్పుడు వారు తెలుగు శాఖలో రీడర్ గా ఉండేవారు. వారు నన్ను చాలా ప్రోత్సహించేవారు. క్రమేపీ నాకు వచన కవిత, కథానిక ప్రక్రియల్లో అభినివేశం, అభిమానం కలగడం ప్రారంభమైంది. అలాగే ఆ రోజుల్లో All India Radio లో పనిచేస్తున్న కీ.శే. వేలూరి సహజానందం గారు నా కవితలని రేడియోలో చదవడానికి ఎన్నో అవకాశలిచ్చి ప్రోత్సహించేవారు. ఇంగ్లండు లో రసాయనిక పరిశోధన శాస్త్రవేత్తగా పనిచేస్తున్నప్పుడు నాకు గీతాంజలి అనే బహుభాషా కవుల సంఘంతో పరిచయమేర్పడి వారి ప్రోత్సాహంతో తెలుగు, ఆంగ్ల భాషల్లో కవితలు రాయడం మొదలుపెట్టాను. ఆ సంస్థ అధ్యక్షులు డా కృష్ణకుమార్ గారు ఉత్తరప్రదేశ్ వారైనా తెలుగు భాష మీద మిక్కిలి గౌరవం చూపించి రెండు సంకలనాలలో నా తెలుగు మరియు ఆంగ్ల కవితలు ముద్రించారు. సుమారు 4 సంవత్సరాల క్రితం ఇంకో తెలుగు సాహితీ అకాడెమీ సమూహంతో పరిచయమేర్పడి తెలుగులో మాత్రమే కవితలు రాయడం మొదలెట్టాను. ఆ సమూహ అధ్యక్షులు మాజీ ఉపకులపతులు గంగిశెట్టి లక్ష్మీనారాయణగారు ఎంతో అభిమానంతో నాకు స్వాగతం పలికి నాకు మార్గదర్శకులుగా నిలబడి నా సాహిత్య పయనానికి దోహదమిచ్చారు.
మార్చి 2023 హైదరాబాదు సిరికోన సాహితీ అకాడమీ కార్యక్రమంలో పొట్టి శ్రీరాములు యూనివర్సిటీ ఉపకులపతులు ఆచార్య కిషన్ రావు గారు నా కవితా సంపుటి ‘మనసు విప్పిన మడతలు’ ఆవిష్కరించారు. నా కవితా సంపుటిని ప్రశంసించిన పెద్దలందరికీ వినమ్ర నమస్సులు.
ఆచార్య రాణి సదాశివమూర్తి, కులపతి, శ్రీ వెంకటేశ్వర వేద విశ్వవిద్యాలయం, తిరుపతి
వీరి కవితలను చదువుతుంటే ఒక భాద్యత గల కవయిత్రి, కనబడని సూత్రధారిణి గోచరిస్తారు. ప్రతి శీర్షికలో ఒక కొత్తదనం, పద పదంలో మెత్తదనం, కవిత కవితలోచిత్తాన్ని కదిలిచే చిత్తరువులు, చిత్ర వైచిత్రిని నింపుకున్న భావ కల్పతరువులు దర్శనమిస్తాయి.
శ్రీ నివర్తి మోహన్ కుమార్, చార్టెడ్ ఎకౌంటెంట్
పురుషాధిక్య సమాజంలో గ్లాస్ సీలింగ్ బ్రద్దలుచేసి తమదైన ప్రత్యేకత నిలుపుకున్న భారతీయ వనితల్లో అరవిందారావుగారు కూడా ఒకరు. వీరు పరస్పర భిన్న ప్రవృత్తులను సమతుల్యము చేసుకుని జీవితాన్ని ఒక కళగా మలుచుకున్నవారు. ప్రస్తుత కవితాకదంబమే అందుకు సాక్ష్యం.
డా శారదాపూర్ణ శొంఠి షికాగో, యు.ఎస్.ఎ.
అరవింద గజల్ రచయిత్రిగా, సృజనాత్మక గేయరచయిత్రిగా, గాయనిగా పేరెన్నికగన్నారు. ఆమె వృత్తి ఉజ్వలం. ప్రవృత్తి అద్భుతం. ఆమె కవితలు భావ కవిత్వ ధోరణిలో సాగుతాయి. చదువరుల అంతరంగాన్ని సుతారంగా తాకి, ఊపి ఆమె అనుభూతిలో భాగమవుతాయి. భావకవిత్వ సమాలోచనకి ఈ కవితా సంపుటి బర్హిపింఛం.
నా ఈ కవితా సంపుటి ‘మనసు విప్పిన మడతలు’ లోని కవితలు ఇకపై సిరిమల్లె పత్రికలో ప్రతినెలా పాటకులను అలరిస్తాయని నమ్ముతున్నాను.
నమస్కారములతో – పారనంది అరవిందారావు