లోనుదృఢంబుగాని పెను | లోభిని నమ్మి యసాధ్యకార్యముల్
కానక పూనునేనతడు | గ్రక్కునఁగూలును నోటిపుట్టిపై
మానవుఁడెక్కడిపోవ నొక | మాటు బుటుక్కున ముంపకుండునే
తానొక లోఁతునం గెడపి | దానిఁదరింపఁగ లేక భాస్కరా!

తాత్పర్యము: భాస్కరా! లోకంలో ప్రయాణ సందర్భమున పాతదై చిల్లిపడిన ‘పుట్టి’ అనే నీటి ప్రయాణ సాధనం పైన మనుష్యుడు ఎక్కి చాలా లోతుగల ప్రవాహమును దాటడానికి ప్రయత్నం చేస్తే, ఆ ప్రవాహమునకు పుట్టి తట్టుకొనలేక తటాలున మునిగిపోవును. అట్లే మానవుడు మనస్సు స్థిరత్వం లేని వారిని నమ్మి ఒక గొప్ప కార్యమునకు పూనినచో, ఆ కార్యము పుట్టివలె తటాలున మునుగును. కార్యము చెడునని భావము.