సీ. చుక్క పూర్వాషాఢ శోభిల్లు పున్నమి
         కల మాస మాషాఢ; మెలమి సలుప
     శరధినదీస్నానజపదానపారాయ
         ణ లొసంగు నుత్తమఫలితములను;
     కర్కాటకముఁ జొచ్చఁ గమలాప్తుఁ డీ నెల
         నారంభ మగు దక్షిణాయనంబు;
     వ్యాసపూర్ణిమ తోడ భాసిల్లు మాసంబు;
         పితృదేవతలకును బ్రియకరంబు;
     పూరీజగన్నాథభూరిరథోత్సవ
         స్కందపంచమిషష్ఠికాల మిదియె;
     శుద్ధసప్తమినాఁడు చోద్యంబుగా దిన
         రాత్రముల్ సరిసమార్థంబు లగును;
     మొదటి యేకాదశి ముఖ్యచాతుర్మాస
         వ్రతమున కారంభపర్వదివస;
     మారోగ్యపరసమస్యలకుఁ గాలము; శూన్య
         మాసంబు; స్వస్థతధ్యాస నిలిపి
     పల్లెపత్తనముల భామ లెందఱొ కూడి
         యాడుచుఁ బాడుచు నమ్మవారి
     కతిశ్రద్ధ బోనాల నర్పించెదరు తెలం
         గాణప్రజలు; సేద్యకార్యములకు

తే.గీ. నడుము బిగియించి కర్షకుల్ నాందిపలుకు
      తరుణ మిది; క్రొత్తకోడళ్ళు తల్లియింట
      గడుపు నియమంబు పెట్టిరి గడుసరులగు
      పెద్ద లాషాఢవైశిష్ట్య మిద్ది కాదె?