నేను అంటూ ప్రారంభిస్తానే కానీ
రాసేదంతా నీ గురించే
అల్లుకున్న కవితలన్నీ
ఆనందవలయాలు కావాలంటే
కేంద్రబిందువు నువ్వయితేనే
కించిత్తైనా సాధ్య మయ్యేది

నిదురించే సూర్యుడిలో
నీ అలసట పలవరిస్తుంది
కరుణించే మబ్బుల్లో
నీ పెద్దరికం ప్రతిఫలిస్తుంది
మిణుగురు పురుగుకదలికలో
నీ కంటిచూపు వెలుగు లీనుతుంది
తనువును తాకే ప్రతిమారుతంలోనూ
నీ కరాంగుళుల సోకు
వర్తమానాన్ని తట్టి లేపుతుంది

నేనేదో రాస్తూనే ఉంటాను గానీ
నువ్వు ధ్రువీకరిస్తేనే
ప్రతిపదమూ ఒక క్రొన్నన
జానపదంలోనూ
వేదనాదం వినిపిస్తున్నా
నువ్వు అవునంటేనే మన్నన
నిన్ను వల్లెవేస్తేనే
నిలువెత్తు కంబంలా నిశ్చలమననం
నువ్వు ముల్లె కడితేనే
రహదారిలోనూ రసమయజీవనం

నేనేదో అనుకుంటూ వుంటాను గానీ
నువ్వు తలూపితేనే
నా గుండె ఆగకుండా ఆడగలిగేది
నువ్వు దరహసిస్తేనే
నా మాట ప్రవాహమై పరవళ్ళు త్రొక్కేది
చెలిమిమొగసాల ముందు
రంగవల్లిగా నువ్వు నిలిస్తేనే
నువ్వూ నేనూ ఒక్కటిగా లీనమయ్యేది

మత్తు మందును సేవించిన మగత నిద్దుర
కంటికి దూరంగా
ఒంటికి భారంగా
అక్కడెక్కడో జోగుతోంది

కలల అలల తాకిడికై
ఎదురు చూసీ చూసీ అలసిన కనులు
కుంకుమను తాగి ఎర్రబడ్డాయి

ఉండుండీ ఏ పిలుపు కోసమో
కొట్టుకుంటున్న ప్రాణం
ఏకాంతానికి మరి కొంచెం ఎరువు వేసి
ఏపుగా పెంచుకుంటోంది

రాలి పడుతున్న
తోకచుక్క చివరకు అంటుకుని
ఏ ఎదురు చూపులూ తిరిగి రాలేదని
ఆశ నిరాశ ఒడిలో చేరి
వెక్కి వెక్కి ఏడుస్తోంది...

మనిషికి మనిషికి ఎడం జరిగిన మాట
మౌనంగా తల వంచుకుని
మూడు కోతుల ముచ్చట్లను
ముసి ముసిగా తలచుకుంటోంది
అంతిమ ఘడియల కాలం ఆసన్నమైనదని
తనకై తానే దుఃఖపడుతోంది.....

ఆటపాటల యవ్వనం
క్లబ్ పబ్స్ సంస్కృతిలో
దహనమైపోతూ
విష సంకేతాల విశ్వానికి రూపునిస్తుంది !

విజ్ఞాన వీచికల్ని పెంచే విద్య
కార్పోరేట్ కబందహస్తాల్లో
నిర్భంధమైపోతూ
ధన అహంకార తిమిరానికి ఆశ్రయమిస్తుంది !

అష్ట దిక్పాలికై కంప్యూటర్ వ్యాధి
యువ హార్మోనుల్లో విస్తరిస్తూ
నాలుగు గోడల మధ్య
బాల్య వృద్ధుల్ని తయారుచేస్తుంది!

నవనిర్మాణ యువత
అంతర్జాల ఇంద్రజాల మాయకు
అతుక్కుపోతూ
నిర్వీర్య భవిష్యత్తుకు కారణమౌతుంది !

సవరించే చర్యలు చేయకపోతే
క్రమశిక్షణతో సమయాన్ని
విభజించకపోతే
జీవన ప్రాధాన్యతల్ని
విస్మరిస్తే...

అతిచేరువలోనే
శూన్యులమైపోతాం
జ్ఞానమున్నా అజ్ఞానులుగా మిగిలిపోతాం !

అమ్మల గన్న యమ్మరా
ఆది పరాశక్తి రా
జన్మ నిచ్చెడి జననిరా
పాలు పట్టెడి పావనిరా

ప్రేమ జూపెడి దేవతరా
జోల పాడెడి జానకిరా
లాల పోసెడి లక్ష్మిరా
కడుపు నింపెడి అన్నపూర్ణరా

ఇల్లు కాపాడేటి గృహలక్ష్మిరా
చల్లగ జూసేటి కల్పవల్లిరా
అక్కయై ఆదుకొనునురా
చెల్లి యై చెంత నిలుచురా

మమతల సమతల వెల్లువరా
నిష్కల్మష మనసుల తల్లులురా
చదువుల తల్లికి సరిసాటిరా
ఆకాశం లో సగ భాగం వీరేరా

దుష్ట చూపులు చూడకు
చేతులెత్తి దండం పెట్టు
అమ్మ చెల్లి అక్క భార్య
ఎవరైనా నీ బాగు కోరేవారే

ఏటి కోసారి వందనం సరిపోదు
నిత్య జీవితం లో నీ దృష్టి మార్చు
సింధు గోదావరు లే నీ ఆదర్శం
గంగా యమునలే నీ సర్వం

సృష్టి అంతా స్త్రీ రూపమే
కొండలు బండలు తప్ప
ఉప్పు సముద్రం తప్ప
పువ్వే రా స్త్రీ, నవ్వే రా స్త్రీ

సర్వ మానవ కళ్యాణం
జరగాలని కోరుకుంటూ
స్త్రీ ని పూజించే సంప్రదాయం
తిరిగి రావాలని ఆకాంక్షిస్తూ...

వెలుపై వేల్పుగ వ్రేలినావు కనులన్ బేటన్ మఱిన్ గోటలన్
వలపై వాల్పుగ వ్రాలినావు మలలన్ బాటన్ మఱిన్ దోటలన్
తలపై తాల్పుగ దాల్చినావు నుడులన్ దాటిన్ మఱిన్ బాటలన్
శిలపై శిల్పము! ఆత్మకూరునిలయా శ్రీ రాజ రాజేశ్వరీ!

భావము :- అమ్మా శ్రీరాజరాజేశ్వరీ ! నీవు దేవతగా విశాలమగు రూపముతోడ మా కన్నులందును గ్రామములందును కోటలందును విగ్రహమై నిలచియున్నావు. నీవు మాపైన ప్రేమకలుగునప్పుడు కొండలపైనను వాని బాటలందును తోటలందును విగ్రహమై నిలిచి యున్నావు. నీ తలంపునకు రాగా మా మాటలందును పాటలందును ఆ పాటల దాటులందును నిలచితివి. కాని శిలపైన గల నీ శిల్ప రూపమే అద్భుత సౌందర్య కళాత్మిమై యున్నది.