ప్రశ్నలు
ప్రశ్నలు! ప్రశ్నలు? బతుకంతా ప్రశ్నలే?
కొన్ని ప్రశ్నలకి జవాబులు లేవు
కొన్నిటికి జవాబులు వెదకను! భయం!
కొన్నిటికి తెలిసి నేనడగను! భీతి!
కొన్ని ప్రశ్నలని చాపలా చుట్టేసి
మది పొరలలో దాచేస్తాను.
కొన్ని జవాబులు… ప్రశ్నలేమిటనే
ప్రశ్నని రేకెత్తిస్తాయి
కొన్ని జవాబులు ఎదురుగా నిలబడి
సవాలు చేస్తాయి
కొన్ని ఉన్నాను… లేను అన్నట్లు
దోబూచులాడుతాయి
కొన్ని గోడమీద పిల్లివాటంలా
అటూ దూకవు ఇటూ దూకవు!
కొన్ని నువ్వే ఊహించు!
.... అన్నట్లు కొంటెగా నవ్వుతాయి
కొన్ని కొండవీటి ధీరుడిలా
నిలబడి కొరడా ఝుళిపిస్తాయి
కొన్ని జవాబులు…. వినే ధైర్యం ఉందా!
అన్నట్లు నిలదీసి అడుగుతాయి
కొన్ని పెళ్ళి భోజనం తదుపరి పెద్దల్లాగా
తాపీగా రేపు చెబుతాములే అంటాయి
సతతం పన్నలతో సతమతమయ్యే జీవితం
దొరికీ దొరకని జవాబుల జీవనం
ఈ అన్వేషణలో సాగిపోయే బ్రతుకు
అందిస్తుంది అన్ని రకాల ప్రత్యుక్తిలు
నచ్చినవి ఏరుకుంటూ నిజమని నమ్ముతూ
మనుగడ సాగిస్తున్న మామూలు మడిసిని!
మనసా!
మనసా! నీకు
వయసు లేదు సొగసు లేదు
వావి వరసలు లేవు ఇల్లు వాకిలి లేవు
అంద చందాలు లేవు అన్నపానాలు లేవు
అస్తిపాస్తులు లెవు అన్నదమ్ములులేరు
ఊరు పేరులు లేవు నామం న్యాయం లేవు
నిద్రనైనా వేకునైనా ఎండనైనా నీడనైనా
గాలిలోనికి గగనానికి గగనమంత భువనాలకి
తెలిసిన ప్రాంతానికి తెలియని ప్రాకారాలకి
రెక్కలు కట్టుకుని రివ్వున ఎగిరిపోయి
మమతలు పంచేందుకు కలతలు తీర్చేందుకు
కంటినీరు తుడిచేందుకు వలపులు పెంచేందుకు
వస్తావు పోతావు…. కాని
ఈ దేహం నా ఇల్లు …ఈ హృదయం నా గూడు
నన్నడగక మాయమై తిరిగి నా కేసివస్తావు
నీ వ్యాపారాలకి, వృత్తులకి,
పరిణామాలకి పరిమితులు లేవు.
నాకు ధారణ, ధ్యానం, సమాధి
మీద ధ్యాసే లేదు …. అయినా
నీలా ఎగరలేను నింగిని తాకలేను!
నా జడ జీవనం వదిలి ఎక్కడికి వెళ్ళేను ?
*****
ముందుమాట
నాకు చిన్నప్పటినుంచి వచనకవిత్వంలో ఓ రకమైన కుతూహలం ఉండేది. 14-15 ఏళ్ళ వయస్సులోనే కీర్తి శేషులు డాక్టర్ సి. నారాయణరెడ్డి గారి కవితలు, వారు ఆ కవితలని పఠించే తీరు నన్ను చాలా ఆకర్షించేది. నేను ఉస్మానియా విశ్వవిద్యాలయంలో రసాయనిక శాస్త్రం అభ్యసిస్తున్నప్పుడు వారు తెలుగు శాఖలో రీడర్ గా ఉండేవారు. వారు నన్ను చాలా ప్రోత్సహించేవారు. క్రమేపీ నాకు వచన కవిత, కథానిక ప్రక్రియల్లో అభినివేశం, అభిమానం కలగడం ప్రారంభమైంది. అలాగే ఆ రోజుల్లో All India Radio లో పనిచేస్తున్న కీ.శే. వేలూరి సహజానందం గారు నా కవితలని రేడియోలో చదవడానికి ఎన్నో అవకాశలిచ్చి ప్రోత్సహించేవారు. ఇంగ్లండు లో రసాయనిక పరిశోధన శాస్త్రవేత్తగా పనిచేస్తున్నప్పుడు నాకు గీతాంజలి అనే బహుభాషా కవుల సంఘంతో పరిచయమేర్పడి వారి ప్రోత్సాహంతో తెలుగు, ఆంగ్ల భాషల్లో కవితలు రాయడం మొదలుపెట్టాను. ఆ సంస్థ అధ్యక్షులు డా కృష్ణకుమార్ గారు ఉత్తరప్రదేశ్ వారైనా తెలుగు భాష మీద మిక్కిలి గౌరవం చూపించి రెండు సంకలనాలలో నా తెలుగు మరియు ఆంగ్ల కవితలు ముద్రించారు. సుమారు 4 సంవత్సరాల క్రితం ఇంకో తెలుగు సాహితీ అకాడెమీ సమూహంతో పరిచయమేర్పడి తెలుగులో మాత్రమే కవితలు రాయడం మొదలెట్టాను. ఆ సమూహ అధ్యక్షులు మాజీ ఉపకులపతులు గంగిశెట్టి లక్ష్మీనారాయణగారు ఎంతో అభిమానంతో నాకు స్వాగతం పలికి నాకు మార్గదర్శకులుగా నిలబడి నా సాహిత్య పయనానికి దోహదమిచ్చారు.
మార్చి 2023 హైదరాబాదు సిరికోన సాహితీ అకాడమీ కార్యక్రమంలో పొట్టి శ్రీరాములు యూనివర్సిటీ ఉపకులపతులు ఆచార్య కిషన్ రావు గారు నా కవితా సంపుటి ‘మనసు విప్పిన మడతలు’ ఆవిష్కరించారు. నా కవితా సంపుటిని ప్రశంసించిన పెద్దలందరికీ వినమ్ర నమస్సులు.
ఆచార్య రాణి సదాశివమూర్తి, కులపతి, శ్రీ వెంకటేశ్వర వేద విశ్వవిద్యాలయం, తిరుపతి
వీరి కవితలను చదువుతుంటే ఒక భాద్యత గల కవయిత్రి, కనబడని సూత్రధారిణి గోచరిస్తారు. ప్రతి శీర్షికలో ఒక కొత్తదనం, పద పదంలో మెత్తదనం, కవిత కవితలోచిత్తాన్ని కదిలిచే చిత్తరువులు, చిత్ర వైచిత్రిని నింపుకున్న భావ కల్పతరువులు దర్శనమిస్తాయి.
శ్రీ నివర్తి మోహన్ కుమార్, చార్టెడ్ ఎకౌంటెంట్
పురుషాధిక్య సమాజంలో గ్లాస్ సీలింగ్ బ్రద్దలుచేసి తమదైన ప్రత్యేకత నిలుపుకున్న భారతీయ వనితల్లో అరవిందారావుగారు కూడా ఒకరు. వీరు పరస్పర భిన్న ప్రవృత్తులను సమతుల్యము చేసుకుని జీవితాన్ని ఒక కళగా మలుచుకున్నవారు. ప్రస్తుత కవితాకదంబమే అందుకు సాక్ష్యం.
డా శారదాపూర్ణ శొంఠి షికాగో, యు.ఎస్.ఎ.
అరవింద గజల్ రచయిత్రిగా, సృజనాత్మక గేయరచయిత్రిగా, గాయనిగా పేరెన్నికగన్నారు. ఆమె వృత్తి ఉజ్వలం. ప్రవృత్తి అద్భుతం. ఆమె కవితలు భావ కవిత్వ ధోరణిలో సాగుతాయి. చదువరుల అంతరంగాన్ని సుతారంగా తాకి, ఊపి ఆమె అనుభూతిలో భాగమవుతాయి. భావకవిత్వ సమాలోచనకి ఈ కవితా సంపుటి బర్హిపింఛం.
నా ఈ కవితా సంపుటి ‘మనసు విప్పిన మడతలు’ లోని కవితలు ఇకపై సిరిమల్లె పత్రికలో ప్రతినెలా పాటకులను అలరిస్తాయని నమ్ముతున్నాను.
నమస్కారములతో – పారనంది అరవిందారావు