అమ్మకు తెలియకుండా-

అలమరలో దాచిపెట్టిన

పాలకుండలోంచి పట్టేసిన మీగడలాగా

మనవడంటే ఇష్టం...

 

నాన్నకు తెలియకుండా-

ఎద్దులకోసం పొయ్యిమీద ఉడకేసిన

మట్టికుండలోంచి లాగేసిన ఉలవగుగ్గిళ్ళలాగా

మనవడంటే ఇష్టం...

 

అక్కయ్యకు తెలియకుండా-

స్కూలుఫీజు లోంచి మిగుల్చుకున్న

పావలాతో చూసేసిన ఎన్టీయార్ జానపదచిత్రంలా

మనవడంటే ఇష్టం...

 

అన్నయ్యకు తెలియకుండా-

నాతోపాటు స్కూలుకొచ్చే అందమైన అమ్మాయికి

పెడతా మనుకున్నా పెట్టలేని ముద్దులాగా

మనవడంటే ఇష్టం...

 

పెద్దవాళ్ళ నంతా మరిపిస్తూ

నా మానసప్రాణమూర్తిగా మురిపిస్తూ ...

నన్ను బాల్యంలోకి లాక్కెళుతూ

నన్నూ ఓ బాలుణ్ణి చేస్తున్న

నా మనవ డంటే నా కెంతో ఇష్టం...