మేడల మిద్దెలందు కడు మేలిమిపూతల వన్నెకెక్కి నీ
తోడుగ ద్వారజాల(1)పటతోరణశిల్పకళాప్రపంచమున్
వేడుక సంతరించుకొని విందువు కందువు మానవాళి కా
పాడెద వన్నివేళల కృపారహితుల్ నిను చీదరించినన్
         (1) కిటికీ

పేడయినన్ గ్రహించెదవు పేదలవాడల పూరిపాకలన్
వీడక వారి క్షేమమును నీవిధి చూచెడివారు లేరుగా
నీడ నొసంగి గ్రీష్మమున నీ వొనరించు సపర్యనొంది నిన్
జూడక పంచితిల్లెదరు(1) చూడుమ మానవజాతి(2)సంస్కృతిన్
         (1) మూత్రవిసర్జన చేసెదరు (2) మానవజాతి, మా నవజాతి

సాకుదొరకి నంత సామగ్రి చేపట్టి
తోచి నట్లు మేను తొలిచి తొలిచి
మేకులెల్ల దింపి మిక్కిలిభారంబు
వైచి సంతసించు వైన మరసి

పాడయినన్ శతాబ్దముల పాతకథల్ వినిపించి కాలమే
తోడయి కూలునందనుక దొడ్డధనంబులు దాచిపెట్టి నీ
ప్రోడతనంబు(1) చాటెదవు మూర్ఖులు వ్రాసిన పిచ్చివ్రాతలన్
కూడ భరింతు వోరుపునకున్ నిను పోలినవారు లే రిలన్

(1) ఇండ్ల మట్టి గోడలలో బంగారం దాచి పెట్టి కట్టేవారు. దీన్ని తెలిసి కూడా పరులకు తెలియనివ్వకపోవడమే గోడ యొక్క ప్రోడతనము